800 bat ardi hilik Uharte Hiriko etxalde batean sute baten ondotik! Joan den ostiral gauean, sute batek makur handiak egin ditu Uharte Hiriko Haranburuan. Arditeia erre da eta barnean ziren 800 bat ardi hil! Suhilzaileak nonbre handian jin dira inguruko kasernetetarik eta gau guzian arizan dira sutea menperatzen. Inkesta Donapaleuko jendarmeriaren gain da. Herriko Etxeak bere sustengu osoa ekartzen du hunkiak direneri. Aste bat lehenago, Pagolan beste etxalde batean sute bat izan zen. Huntan bi pertsona kolpaturik gelditu ziren. Amikuzeko ihauteriak ibiakoitzean (16:00) Aspaldiko partez, horra aurten berriz heldu zaukula Amikuzeko ihauteri desfilea! Parte hartzaile guzieri hitzordua martxoaren 14an, larunbatarekin emana da Airetik aparkalekuan (16:00). Hortik, Joaldunek idekiko dute bidea eta mozorrotu guziek, Zanpantzar lagunduko dute herriko itzulia egiten. Les Amis'kuztar, Gaitamik eta les Mixains txarangek alaituko dute desfilea. Zanpantzarren auzia (18:00) eginen da eta nola ez haren erretzea ere! Su inguruan dantzatzeko parada emana izanen da, xokoletesnea partekatuz. Ondotik talo eta edateko proposatuak izanen dira. Pesta bukatzeko, gaualdi girotsu bat antolatua izanen da Aldaka gaztetxean kontzertu eta DJ Paulo (22:30). Mozorrotu nahi duten guzieri ongi etorri beroena egina izanen zaie! Donapaleuko hautagaien arteko eztabaidak Donapaleuko bi zerrendaburuek, Barthélemy Aguerre eta Charles Massondok, Euskal Irratiek eta Mediabaskek proposatu debatetan parte hartu dute joan den astean. Aguerrek Loustaudaudineren bilana beretzen eta baloratzen baldin badu, Massondok oraiko auzapezaren egiteko manerak salatu ditu, gizon larderiatsua eta guti partekatzen duena bezala erakutsiz. Aipatu gaietan, desberdintasunak agertu dira bi zerrendaburuen artean gehienik "Chemin Bideak" proiektuari buruz. Massondorendako, proiektu hori egin da Donapaleutarrak bazter utziz eta hori damutzen du. Erran du proiektu horren funtzionamendua anitz gostatzen dela eta konduetan zilo handia agertzen dela: 180.000 euro gutiago 2019an. Bere zerrenda pasatzen bada, hitzeman du egitasmoa berriz pentsatuko duela herritarren parte hartzearekin. Aguerrek baloratu du proiektu hori, erranez hala ere ibilerari begira zerbait egin behar dela ziloa konpontzeko. Herri Elkargoari buruz, Aguerrek oroitarazi du hastapenetik proiektu horren kontra zela lekuko poderea ahultzen zuelakotz bainan orain Herri Elkargoarekin lan egin behar dela. Massondok aldiz beti alde izan da eta ikusiz Aguerrek ez zuela parte hartzen elkargoko bilkuretan, erran du berak, Donapaleuko oposizionean izanik ere nola parte hartu duen Herri Elkargoko turismo lan taldean azpimarratuz komisione horietan direla gauzak lantzen. Bi zerrendaburuak ados dira Herri Elkargoaren gain uzteko Donapaleun egin beharra den kirol gela berria. Ikuspuntu desberdinak agertu dira ere Bizi! elkarteak proposatu hitzarmenari buruz (trantsizio ekologikoaren alde) baita ere Euskal Konfederazioak egin proposameneri begira (euskara erabiltzeko). Massondok hitzarmen horiek izenpetu baditu, Aguerrek ez du oraino segidarik eman.