Txileren ezagutza, konferenzia asteartean Larreko kulturgunean aurkitzen ahalko da Hego-Ameriketako herrialde hunek sortzen dituen kontrasteen inguruko konferentzia, "Muturretako Poesia" izendatua. Mendilerro altuak ikus ahala, bi ozeano bortitzen topagunea, Cap Horn lurmurturrean bururatzen da Txileren erremua. Iparraldean, Atakama basamortu idorrena 1.000 kilometrotan, hegoaldean aldiz fiordak, hormaguneak anitz ezezagunak, mendebaldean ozeano Pazifikoa arraintsu basati eta oldartsua eta ekialdean azkenik Andetako mendi xoragarriak. Irudi hauek ikusten ahalko dira dokumental baten bidez, baita azalduak konferentzia moldean. Martxoaren 17an (18:30) iraganen da, Kultur eta Ondare elkartea eta Herriko- Etxeko kultur sailak antolaturik, 2 orenen iraupena, erreserbak 7€, Euskal-Herriko turismo bulegoetan baita lekuan bertan. Antigone antzerkia martxoaren 19an Hemen ere Larreko antzokiaren oholtzan ariko dira "Théâtre des Chimères" taldeak sortzen dituen aktore apartakoak. Sophoclek sorturiko Antigone tragedi ospetsua, birpentsatua da "Antigone à corps perdus" izendapean, hunekin azpimarratu nahi ditu gaurko demokraziaren ahuleziak baita agintzaleen eta populazioaren arteko harremanen haustura. Ostegunean (20:30), programatua da oren bat eta laurdenez, "Théâtre des Chimères" delarik antolatzaile lanetan. Erreserbak, izendatua billetweb sarean baita lekuan bertan, 14 urtez goitikoeri zabaldua da, prezio osoa 10€, prezio apaldua 8€ (baldintzapean). Otsaileko sortze eta heriotzeak Bi sortze seinalatuak zauzku joan den hilabetean: Solann Ezcurdia Maldagorra bizitegian eta Jonas Carcaud Artziringo auzoan. Uros bizi ditela eta zorionak hauen burasoeri. Heriotzeen aldetik: Dumont Jean-Pierre 72 urte, Rodriguez Juan Francisco 75 urte eta De Duranona Joseba 63 urterekin. Hunkituak diren familieri dolumin bizienak. Iragan Ihauteriak Egunaldi txarrak jendetza ttipiagoa ekarri du herriko karrika nagusira, halere ekitaldi gehienak iragan dira giro on batean. San Pantzarren auzian, herriko bozak aipatu gabe ezinezkoa zen eta epaimahaiaren erretzeko kondena bete da denen atseginetan. Txapela merezi du antolatze lanetan aritu diren gazte andana dinamika horrek, baitakite besta giro alaia sortzen beren inguruan. "Super loto" Lion's Club elkarteak antolatzen du Ibarrun Inharrian "Super Loto" bat, martxoaren 13an (20:30). Haatik etxaldea idekia izanen da 18:30etan, bertan jan eta edateko manera eskainia da, sortuko diren irabaziak elkartearen obra sozialeri joanen dira. Sari ederren mentura dago. Zirikolatzen besta Zirikolatzen besta handiari buruz martxoaren 20 eta 21ean iraganen dena, iduri luke ostiraleko ikusgarria (12€) eta biharamuneko afariarendako (20€) leku batzuk libro direla. Gure ohituren zaindari den elkarte hunek euskal dantza eta musikaren bitartez merezi baitu parte hartze handi bat. Pilota solas Palantxako Euskal-Herriko final handiak ginituen martxoaren 1ean Gantxiki trinketean, hauetan barne gure neska bikotea Elorri Borda eta Magali Comet. Haatik aitzinean bazuten gailur baten iduriko ekipa Amaia Etcheleku eta Maritxu Chapelet- Housset. Herriko trinketean aritzeak ez dakote fagore eman, halere partida parekatua izan da emaitzaren arabera 15-10 eta 15- 13. Txaloak zueri eta nork daki bertze batean gauzak ez diren itzuliko zuen alde?