CARACAS, VENEZUELA. 70 urte bete dira Caracaseko Eusko Etxearen eraikina estreinatu zutenetik. Etxe dotorea da, ikusgarria erraiten ahal dugu, handia, euskal estilokoa eta hastapenean eta luzaroan argindarra bezala izan zen munduko euskal etxeetan, euskal etxe indartsua, anitz euskaldun eta euskal familiaren biltoki, euskararen, euskal kulturaren eta euskal politika abertzalearen lantoki eta hedaleku. Izan ere, Hego Euskal Herrian frankismoaren urte beltzenak zirenean estreinatu zen, 1950eko martxoan, andana bat euskal familia errefuxiatu Venezuelara iheslari helduak zirelarik, familia haien sustengu eta engaiamendu azkarrari esker, erakunde ekimentsu eta bizia, Diaspora osoan Erbesteko Eusko Jaurlaritzaren sustengu nagusi eta laguntzaile aparta. Tenore eta garai zailenetan, Venezuelako euskal diaspora, euskalgintzaren eta erbesteko euskal erakundeen zutarri eta babesle hautua izan zen, eta Euskal Herria zorretan geratu zen betirako Caracasen eta herrialde osoan sortuko ziren euskal etxeekin eta ororen buru euskal familia eta euskaldunekin. Lehenengo lehendakari Jose Antonio Agirre ere bertaratu zen. Estreinaldian izan zirenek erran zuten hitzez azaltzen batere erreza ez dela han bizi ukan zutena, giroa, jendartea, izpiritu eta partaidetza. Frankismoaren urte beltzen tunelean, argi poxi bat ekarri zuen. Egun bere urrezko urteak joan dira eta Venezuelako gizarteak ere beste mementu bat bizi du. Hiriburuko El Paraiso deitua den auzoak aspaldi utzi zion paradisu izateari eta bere baitan pilotalekuak, igerilekua, instalazio ederrak dituen Eusko Etxea nekez sartua da XXI. mendean, familia arrunt gutiagoz, baina hauek aitzina egiteko delibero eta engaiamendu azkarraren jabe, gauzak aise ez badira ere. Duela bi urte 22 urteko Ibane Azpiritxaga mutiko gaztea hautatu zuten Eusko Etxea kudeatzen duen taldeko lehendakari eta aurtengo otsailaren 29an berretsi egin dute. Eusko Etxea, egungo Venezuelan, oinarrizko gizarte zerbitzuak ematen entseatzen da bere bazkideeri. Faktore frango dute kontra, baina heien aitama eta aitatxi-amatxik markatu zuten bidea atxiki nahi dute, heien oinordeko duin eta leial izan nahi dute. SAN FRANTZISKO. Helduen astean San Franziskotik mintzatuko gira, NABOk hiriko Gure Euskal Etxean Ipar Ameriketako euskal bertsulariei eginen dien 'Omenaldi Berezi'tik, Gratien Alfaro, Jexux Arriada, Johnny Curutchet, Martin Goicoechea eta Jexux Goñik saria jasoko dutelarik.