Hauteskundeetan aurkezten den ''Ustaritz Avenir'' zerrendak, Dominique Lesbats auzapez ohia buru, biltzar publikoak segitzen ditu. Gaur arte ez zen bera kontseiluan, bere aldeko bi ordezkari ziren oposizioan. Egitaraua osatua du. Hirigintzan dio makur handiak direla eginak gaurko gehiengoarenganik. Lehen lana, xuxendu behar direla dio. Herriko Etxea Lapurdi zentroan finkatzea helburuetan du, Gaztelondoa utziz elkarte batzuen egoitza bezala. Gaztelua (Herriko Etxe zaharra), obrak eginik bilaka ditake erakusketa zentro bat eta museo bat nahi du hor egin: artoarena. Arruntzan Musugorrikoborda gunea (gaurko gehiengoak natura eta laborantzari itzuli duena) nahi du berriz ezarri etxegintzarako. Merkatu estali bat, Lapurdiko aparkalekuan eta supermerkatu berri baten eraikitzea Arruntzan ditu gogoko, bainan dionaz ez du horrentzat lur eremurik. Herriko bideen berritzen segitzea dio beharretan direlako. Ikastetxeen sailean Idekia eskola handitzea, eta Heraitzen eskola berri bat eraikitzea asmotan ditu, jantegietan bio ekoizpenak gehiago sartzea. Elkarteentzat ikusten du Etxehasia gelaren handitzea, Kiroletan ezker pareta eta trinketari segurtasun gehiago emaitea, suhiltzaileen egoitza tokiz aldatzea, Xopolon eraikuntzak mantentzea, jostagune berriak sortzea, Etxeparea gunean, tenis jokatzeko zelai estaliak eta agorespazio bat (kirol anitzekoa) eraikitzea. Laborariak laguntzeko merkatuan salmententzat tokia urririk uztea proposatzen du eta baserri esperimantal bati buruz hausnarketak segitzea. Beharrezko ere ikusten du numeriko pantail batzuen tokian ezartzea herriko berrientzat. Senidetza, euskara eta euskal kultura guti aipatu dira. Finantzari buruz izan ditu galdeak erantzun konkreturik ekarri gabe. Herriak, nahiz ttipitzen ari, oraino zorrak baditu. Uztaritzeko biztanle kopurua emendatzen bada dio tokiko zergatik dirua sar laikeela, doi bat emendatu behar badira ere. Diru egoerak mana dezake egitarau horren burutzea. Geroak erranen. Euskal herriaren metamorfosia ''Bizi'' kolektiboak antolaturik Euskal Herriaren metamorfosiari buruz itun baten izenpetze bat izan da joan den ortzegun gauean Lapurdin. Ipar Euskal Herri osotik bildu dira hautetsi eta hautetsi-gai lerro bat, gehienak Baxe Nafarroa eta Lapurditik. Mauletik abiaturik Uztaritzen gaindi eta Baionan bukatu den martxa baten egitarauan sartzen zen gaualdi hori. Helburua: hautetsi gaieri geroari buruz kontzientzia harraraztea ekologia eta klimaren aldaketaz, lekukotasun gogoetagarriak entzun direla. Hor beharra ere zen FR3 telebistako Audrey Pulvar andere kasetaria bainan treinaren arazo batengatik ez da etorri ahal izan. Haren lekukotasun berezia irakurria izan da. Orohar 70ez goiti ziren zerrenden ordezkariak izenpetu dutena. Uztaritzeri doakionez lau zerrendetarik hiruk izenpetu dute. Jan edari batzuen inguruan segitu da gaualdia. Biltzar nagusi Arruntzan finkatua den ''Hegalaldia'' elkarteak bere biltzar nagusia zuen otsailaren 29an Lapurdin. Iragan urtean 20 urte bete ditu, 325 kiderekin, baditu gaur egun 4 langile eta beste 3 kontratupean. Elkarteak deraman lana da ugaztun ttipi batzuen, bainan bereziki hegaztien artatzea kolpatuak biltzen dituztelarik, jende batzuk ekar dezazketenak edo jakinean berak bila joanez. Hegaztietan gehien bat harrapariak dituzte artatzen: arrano, sai edo huntzak; ugaztunetan gehien bat sagarroiak, urtxintxak, andderederrak eta azkonak (zergatik ez). Animale kolpatuen kopurua beti handituz doala diote gizarteak egiten dituen kalteengatik: poluzio, pozoin, zepo, ihizi eta abar... Arta tokia handitzeko zailtasunak ukaiten dituzte administrazio aldetik eta ere diru laguntzen aldetik. Aurtengo egitasmoetan ditu sentsibilizazio eta hezkuntza kanpainak segitzea, ikastetxetan hitzaldiak egitea eta pedagogi baratze baten sorkuntza. Baldintzen eta diru laguntzen arabera segituko dutela aitortu dute.