Igandean da beraz herriko bozen lehen igandea. Beharrez, ondoko zortzian bigarrena. Herri gehienetan bi itzuli izanen direla, nehork ez du duda handirik. Gure Kostaldean, Biriatun da auzia lehen igandean trenkatuko, bi zerrenda izanki buruz-buru. Donibane Lohizunen, lau hautagai zerrenda izanikan ere, batzuk diote auzapezarenak partida irabazten ahal lukeela, gutiz bada gutiz, lehen bozaldian berean. Anitzen ustez haatik bigarren bozaldi bat beharko da. Egia erran, nehork ez daki zonbat boz bilduko dituen Manuel de Lara buru duen zerrendak. Batzuk arrunt apal ikusten dute, beste batzuk arras gora. Igandean ikusi behar. Ziburun, bost zerrenda plantatuak dira zoin-gehiagoka. Hor ere, parioak libro pilota partidetan bezala! Urruñan hiru zerrenda eta Hendaian lau. Bi herri horietan ere bigarren igandean eginen da harat- -hunata. Denetan, arras plantan badoa kanpaina, ez ahal da azken egunetan saminduko. Sare soziala deitzen duten hortan dira denik ere kalapita edo mokokaldi samurrenak. Oro har, herri gehienetan, arrangura berak agertzen dira, nola hobeki begiratu hiribarnea, nola emenda autoen aparkatzeko errextasunak. Hiri bakoitx badira ere nahitez gai bereziak. Donibanen konparazione, tirabira handienak dira portu hegi hortan egitekoak diren obra horietaz. Aparkaleku handi baten hor lurpez egitea egoki den ala ez. Ziburun, joan den astean ja azpimarratzen ginuen bezala, noiz nahi aipatzen da besteak beste Iturri-Baita etxe hori, inguruan duen eremuarekin, saldu behar den ala ez, eta ez bada saltzen zertan nola baliatu behar den.