Herriz Herri - Donapaleu (NB) | 2022ko Irailaren 01a
Indar joko - ELB 40 urte - Dantza baleta - Odol emaitea
Zazpi urtez segidan, Donazaharre nagusi Donapaleuko euskal indar jokoan
71. indar joko festibala, Donapaleuko pilota plazan jokatu da, agorrilaren 21ean publiko handi baten aitzinean. Denbora lagun, zazpi ekipek parte hartu dute lehiaketa hortan: Donamartiri, Jutsi, Donazaharre, Urdiñarbe, Gabadi/Donapaleu eta Mitikile.
Huna zoin izan diren aurtengo txapeldunak:
Segari: Elissalde anaiak (Donamartiri).
Orga joko: Mathieu Aphessetche (Donamartiri).
Zakulari: Xabi Mendiboure (Donazaharre) lehen sailean eta Rémi Cazanave (Mitikile) bigarren sailean.
Lasto altxari: Arthur Van Der (Donazaharre).
Aizkolari: Arthur Van Der (Donazaharre).
Soka tira: Donamartiri.
Klasamendu orokorrean, Donazaharre nagusi ateratzen da, zazpigarren aldikoz segidan. Bigarren Jutsi eta hirugarren Donamartiri, ondotik heldu dira Urdiñarbe, Gabadi/Donapaleu eta Mitikile.
ELBren 40 urteak!
Euskal Herriko Laborarien Batasuna (ELB) 1982an sortu zen laborantza herrikoi baten sustengatzeko. Aurten bere 40 urteak ospatuko ditu, irailaren 10ean, Izpuran.
Zenbait egun lehenago Donapaleun gaualdia antolatzen du, bi galdera gogoetatzeko: "zer etorkizun laborantza herrikoiarentzat?" eta"Zer platera 2050ean?". Gaualdi hori irailaren 7an iraganen da, asteazkenez, Donapaleuko zinegelan (20:30). Patxi Iriartek animatuko du. Bukatzean, baso baten edateko parada emana izanen da.
"La belle au bois dormant" baleta Donapaleun: Illicite konpainiak emanik
Balet hau, Fabio Lopez, Thierry Malandainen dantzari ohiak muntatu du, bere taldeko 13 dantzariekin. Prentsa espezializatuarengandik kritiko baikorrak ukan ditu, itxaropen handiko koreografoa daukate.
"La belle au bois dormant" balleta irailaren 10ean emana izanen da Donapaleuko zinegelan (20:30). Sartzea: 15€ / 12 € / 10€. Txartelak aitzinetik hartzen ahal dira.
Odol emaitea Donapaleun
EFS egiturak odola biltzeko bi egun antolatzen ditu, Donapaleun, irailaren 5ean, astelehenez (8:00-12:00) eta 6an asteartez (15:00-19:00). Odola eman nahi dutenek, beren izena aitzinetik eman behar dute mon-rdv-dondesang.efs.sante.fr sarean sartuz. Odol emaitea Hitz Argi gelan eginen da.
