Ostiral goizarekin emeki-emeki jendea hurbiltzen hasi da, ezker paretan antolatua zen Gasnaren Bestara. Makeatik bai eta beste leku batzuetarik laborari anitz, bakoitzak bere ekoizpenak saltzeko etorriak ziren. Gasna, erreximenta, esnekiak, dutea, arnoa, fruitu jusak... eta zerrikiak, bazen zer dasta eta eros.

Memento berean ardi gasna lehiaketa iragaiten zen, Elodie Olhats Ogibarneko sukaldaria, Puy Arrieta Zeanuriko laboraria, Fabien Hourtané Ossau-Iraty dastaketa batzordeko presidentea, Jean-Marc Salva Biarritzeko Chailla gasna fintzailea eta Beñat Saint-Esteben Berria gasnategiko presidenteak 8 gasna dastatu dituzte. Lehen agertu da Ursumu Itsasuko etxaldea.

Eguerdi aldean jendalde ederra bildua zen, baso bat edanez Bixente Chapelet, Paxkal Betoule eta Henri Amestoy sukaldari adituek egin platerak jaten zirela. Arratsaldean Iparralde eta Hegoaldeko ardi mozte zein-gehiago iragan da, hazpandarrak irabazi du. Gasna nola egiten zen, Francis Poineau artzainak erakutsi du.

Artzainen Lasterketan parte hartzeko jendea etorria zen, eguraldia alde zela ezker paretatik Urtsu kaskoan gaindi, berriz abiatu lekura etorri dira. Guillaume Levoy baionarrak irabazi du. Ondotik iragan den artzain xakur txapelketak arrakasta bildu du, Kiki Bordatxok gaualdia bururatzen zuela.

Goresmenak Makeako Laborariak elkarteari holako egun goxoa antolaturik, heldu den urtean berriz eginen dela esperantzarekin.