Agorrilaren 11n, Jean-Jacques AsceryOihanbidekoak, mundu hau bat batean utzi zuen.

Biarnoko St-Pé de Leren herrian sortua zen 1949an. Sei urtetan ama galdurik Izturitze Agerrera (aitaren etxondoa) jin zen, aitatxi-amatxi, osaba, izeba eta kusien gana eta hortik ibili herriko elizan, eskolan eta beste. Euskara errotik ikasi zuen, denboran eskolan debekatua zelarik.

Handitu eta Parisera joan zen bere aitari buruz, han ofizioa ikasi eta trebatu ondoan berriz Izturitzera itzuli zen Bernadette Garay herritarrarekin ezkontzeko.

Bere bizi berria mende erdi bat iraun duena hor hasi zitzaion. Hastapenean Aiherrako Eskulanak enpresan arizan zen lanean. Ondotik erretreta hartu arte, Arberoako uraren zerbitzuko langile arduradun postua atxiki du. Urte andana batez herriko hautetsi edo kontseilari egona zen.

Bainan oroz gainetik Jean-Jacques zerbitzu egile bezala dugu ezagutu. Herrian, elkarteetan, kermezak egiten zirelarik eta beste, anitz urtez laguntzaile baliosa eta estimagarria izan zen. Laborantxa iraunkorraren "Lurrama" feriako laguntzaile jarraikietarik ere zen.

Oroitzapen onetan gogoan atxikiko dugu haren irri karkaila berezia.

Ehorzketak ederki kantatuak eliza bete betean iragan ziren.

Bernadette espos lagunari, Marc eta Cathy seme alaberi, hauen bizi laguneri, Arnaud eta Maylis haur ttipieri eta ahaidego guziari dolumin bizienak eskaintzen dizkiegu.