Gozategia ostatua astean sei egunez idekia

Asteartean zortzi ideki zen berriz Gozategia ostatua, Jérôme Alfaro kudeatzaile berriarekin. Iduri du hunen hastapena kausitua izan dela bazkaltiar anitz hurbildu baita jatetxera lehen egunetan, bai eta ortzirale eta larunbat arratsez. Joan den asteko berrietan ostatuaren ordutegiari buruz agertu xehetasunak ez onak izanez, xuxenketa merezi dute.

Bi ordutegi mota proposatzen ditu kudeatzaileak: astearte eta asteazkenetan (8:00-17:00), eta ortzegunetan, ortziraletan, eta larunbatetan (8:00-biharamuneko 2:00ak arte). Igandetan (8:00-17:00). Baina igande arratsetan ere idekitzea (aitzinetik erreserbatuz, 17:00ak aitzin) da ostatuko kudeatzailearen xedea. Astelehenetan ostatua hetsia da.

Ostatuarekin harremanetan sartzeko, telefonoz (06-18-40-53-55) edo e-postaz egin ditaike

(alf.jeje@gmail.com). Ongi etorri deneri!

Gura Show taldearen emanaldiak haur eta burasoak loriatu

Euskaraldiaren kari, Beltzuntze elkarteak (Herriko Etxearen eta Euskal Kultur Erakundearen laguntzarekin) kantaldi berezia antolatu zuen ostiralarekin, eskoletako haurreri bereziki zuzendua. Parte hartu duten 140 haur eta burasoek guziz preziatu dute Kattalin Indaburu, Magi Mirande, Maider Cigarroa, Amaia Riouspeyrous eta Philippe Albor-en emanaldia, hauek jakin baitute eskola elebidunetako eta ikastoletako haurrak berenganatzen, ikasleak kantuz arraraziz artistekin betan.

Duela 2 urte Pontx pailazoa zuten gomitatu, aldi huntan Gura Show taldea. Euskara nagusi den mementoak arraroak izanez, gisa bereko ikusgarriak gehiago antolatu behar liratezke, euskararen erabilpena indartzea beharrezkoa baita.

Lauak enpresaren 50 urteak, handizki ospatuak

Bazela mugimendu eta uste gabe joan den ortzirale eta larunbatean, Lauak enpresaren inguruan! 50. urtebetetzea manera berezi batez ospatu dute ortzirale arratsaldean eta larunbatean publiko zabalari ateak idekiz. Larunbat eguerdiarekin deia 800 bisitari kondatzen omen zituzten... Bezperan langileentzat ustegabeko gaualdia antolatu zuten arduradunek, Patrick Bruel kantari frantses ezaguna ekarraraziz, Hazparneko Mendeala gelara.

Enpresa hau Aiherra eta Hazparneko mugan plantatua baldin bada orain, 1975ean sortu zuen "Eskulanak" izenarekin Jean-Marc Charritton bere egungo arduradunak. Lauak taldeak Dassault Abiazioari galdaragintzako piezak ematen zizkion orduan. Orain bere aktibitatea zabaldu da, munduko hegal ezberdinetan lantegiak sorturik hala nola Kanadan, Mexikon, Indian, Portugalen eta Tolosa ondoan l'Ile Jourdain herrian. Langile berezien beharra baitu enpresa hunek, hauen formatzeko eskola ere sortua du. Lehen txandan formatu 25 langileek lana tokian berean atzeman dute.

Orotara 2.000 langile kondatzen dira orain, Aiherra eta Hazparneko 450ak barne. Gaur egun, Lauak taldea aeronautika industriarako lehen mailako piezen, azpimultzoen eta multzoen obratze enpresa nagusietakoa da. Joan den asteburuan, 2 oreneko bisita baten egiteko xantza ukan dute urtebetetze honetara hurbildu diren guziek.