Honela, 'Amerikanuak' du izena Jean Flesherrek eta berarekin batera aritzen den musikari eta lagun taldeak grabatzen bukatu berria duten diskak, eta taldeak.

Salt Lake City, Utah

Honela, 'Amerikanuak' du izena Jean Flesherrek eta berarekin batera aritzen den musikari eta lagun taldeak grabatzen bukatu berria duten diskak, eta taldeak. Lagun zaharra da Jean Flesher Estatu Batuetako euskal besta eta elgarretaratzeetan ibiltzen direnendako, hogeita hamar urtetarik goiti baita ari dela bere akordeonarekin eta musikari bandarekin AEB Mendebalde guziko bazterrak euskal musikaz bustitzen eta betetzen. Egun ere, hiru belaunaldi euskal-amerikar biltzen zaizkio bere jota-fandango, arin-arinak eta aire tradizionalak dantzatzen, tartean baltsak, pasodobleak edota "Nevadarat joan nintzan" bezalako euskal kantu xaharrak. Ezterenzubiko arrazakoa da Jean, Salt Lake Cityn sortua, ama Ehulieneko Marie Maitia. Euskara eta ingelesarekin batera, frantsesa eta espainola ere mintzo ditu, eta Euskal Herria eta euskaldungoa barnean daramatza, bestela ez baita posible, bera bezala, bizitza osoa errepideetan ematea, udan euskal bestaz-besta, akordeona eta ekipoarekin, Kalifornia, Nevada, Utah eta beste zenbait estatutako euskal bestei musika eta euskal sena ekartzen.

Urteak ziren jendeak galdegiten ziola diskarik grabatu behar zuenez. Luze hartu du, baina ondarrean egin du. Euskal piknik eta bestetan, Jean Flesher Band izenaz ari da, baina diskaren egiteko beste izen bat hautatu du, eta hala ari izan da BakersÀ¯'¬'eld-en iragan asteburuan bururatu berria den euskal bestan: 'Amerikanuak' da hautatu duen izena. Diskaren egiteko --eta zuzenean aritzeko-- zenbait lagun musikariz inguratu da, bateko eta besteko emanaldietan musikari kide izan dituen lagunez. Hor dira, Pierre Igoa (diskaren eta taldearen webgunearen diseinatzailea, bestenaz), René Caballero, Michelle Iturriria, Christian Iribarren eta Jean-Pierre Etchechury, baita John Ehlis ere, batere ahantzi gabe bere seme Jean-Jules Flesher, taldeko gazteena, alboka eta panderoa jotzen dituena.

Diska grabatzeko lanak bururatu dituzte eta heldu diren astetan plazaratuko dute. Musika balioak hor ditu, baina zenbaiten aburuz, diskaren balio handiena maitasuna, lekukotasuna, euskal musika eta kulturari darion atxikimendua eta jarraipena emateko nahikaria da, lehenagoko belaunalditik hartu bideari segida ematea, eta hori bizitzea eta transmititzea belaunaldi berrieri (hor da Jean-Jules bera), guzia Ameriketako Euskal Herritik emana. Zenbaitek erraiten dutenez, musika hau, Estatu Batuetako euskaldunen À¯'¬'lmaren musika-banda da, ingelesez soundtrack erraiten dutena, musika hau lagun izanik sortu, hazi eta maitemindu baitira euskaldunak Ameriketan, senarra edo emaztea atxeman dute eta haurrak ere, musika hau dantzatzen hazi eta hazi-arazi dituzte. Orain, grabatua atxematen ahal da. Webgunea ere badute, www.amerikanuak.com helbidean, eta Facebook eta Instagram-en ere badaude. Zorte on Amerikanuak-eri, eta mila esker heier eta zorionak gu zuzier, gure historia euskal-amerikarraren parte bat, diskaratua, baita hemen eskaintzen zaiguna.