"Gaztaina" elkartearen informazio bilkura publikoa

Bidarrai, Heleta, Luhoso, Makea eta Lekornek sortu dute "Gaztaina" elkartea, ekoizpen edo produktu hori baloratzeko xedearekin. Jean-Michel Anchordoquy gure auzapeza da elkarte-buru. Elkartearen harat-hunaten berri emaiteko, informazio bilkura publikoa, deneri idekia, iraganen da urtarrilaren 26an, larunbat arratsaldez (17:30), herriko gelan. Lehendakariak presentatuko ditu elkartearen helburuak eta ibilmoldeak. Ondotik, Anne-Sophie Brélivet-Camus andereak eskainiko du "Gaztaina munduan" mintzaldia. Beñat Itoiz ere mintzatuko zaigu gaztainaren transformatze edo bertzelakatze zikloaz. Bururatzean, aperitifa eskainiko da han diren guzieri. Ongi etorri orori.

Boreal espedizioa

Badu orain bi hilabete hurbil Kanadan daudela Xiril Alvarez eta Paxkal Elgart, beren abentura hotz handietako hormaguneetan aitzina eramaiteko xedearekin. Jadanik aipatua izan dugu hemendik berek izendatu duten Boreal espedizio hori. Bi lagunek apirilaren 15aren muga emana dute, Yellowknifetik Tuktoyaktukerainoko 1.700 kilometroak betetzeko, oinez, bakotxak pulka karroa tiratuz. Hastapen hartan beranta pixka bat hartu badute ere, pulka horiek berantarekin eskuraturik, orain beren ibilaldiaren bete betean dira, 8/10 oren kurrituz egunero eta gauero bivouac batean lo eginez. Bideo ttipi batzuk egiten dituzte, Kanalduderi helarazten dituztenak, eta hain xuxen bideo horiek ikusgai dira internetez kanaldude.eus telebistan, "boreal espedizioa"-ren gainean klikatuz. Biziki interesgarriak dira. Ikusten dira pulka edo lerak tiratzen, kanpalekua muntatzen, sua elurrean pizten, horma zilaturik arrainak arrantzatzen... Diote ere noiztenka otsoak hurbil sumatzen dituztela. Ez da zinez entraaleko abentura, bizi duten hori!