Ziburun, herriko bestak, erran nahi baita beraz Bixintxoak, beti alegerak eta herrikoiak izaiten dira, aroak ez dituelarik laguntzen ere! Joan den asteburu hortan, ukan dute euri uhar ederrik bainan oro har xarmanki iragan dira. Salbu aurten ere pilota partidarik ez dela izan igande aratsaldean. Bestenaz, denak arras untsa joan dira, poteo eta beste! Igandean bazen segur mugimendu! Goizean, lasterkariak karriketan. Meza nagusi kartsu bat eta betiko aurreskua ondotik. Odolgi egileen xapelgoarentzat, jendea azkarki bildu da. Odolgi egileak baziren 26 orotarat. Ofiziokoetan xapeldun atera dira, biek pundutze ber-bera ardietsirik, Pascal Massonde eta Annie Jorajuria, amaturretan lehen Marianne Dufraix eta bigarren Thomas Ugarte. Bertsulariak ere polliki txalotuak izan dira, Xumai Murua eta Aitor Servier, bai eguerditan eta bai aratsaldean. Fandango lehiaketan berrogoita-zonbait gazte arizan dira xarmanki bainan aitzineko urtetan bezala biziki mutiko guti, sei bakarrik alabainan! Ttipienetan, bi bikote lehen, epai-mahaian zirenek ez baitituzte berexten ahal izan, Ilune Dufau eta June Pujos, Amaiur Fagoaga eta Laida Labadie. Handixagoetan, lehen Lilia Larralde eta Xalbat Corret. Handienetan, June eta Laida Etchegaray bi ahizpak. Usaian bezala, parte hartze ederra mus lehiaketan, Cathy jatetxean. Xapeldun, Janine Capdevielle eta Tote Lopez, bigarren Monique Aramburu eta Maialen Iturria, hirugarren Pierre Lafitte eta J-B Etcheverria, laugarren Jean- Noel eta Bixente Bereterbide aita-semeak; kontsolantea delakoaren irabazle Olascuaga osa ba-ilobak. Bigarren asteburua ere airosa behar litake. Igandea bereziki. Goizean, txistulariak karriketan bainan ere gaitero eta atabalariak. Bestalde, arrabestako meza nagusia. Eguerditan, Ziburu Euskaldun kantuz pilota plazan eta Flash Mob delakoa Ravel kaian. Ondotik, herritarren bazkaria Alaiak abesbatzak aitzina airostuko duena. Aratsean, Bixintxoetako azken dantzaldia Esperantza taldearekin.