Otsail Ostegunak Zabalik elkarteak antolaturik

Badu orain 23 urte, Otsail Ostegunak egiten direla Zabalik elkarteak antolaturik. Aurten ere programa aberats bat proposatzen daukute. Otsaileko ostegunetan iraganen dira arratseko 8.30etarik 11k arte Donapaleun. Huna aurtengo programa. Otsailaren 7an: Maialen MORENO ZUBELDIAk Iparralde huntan bildu irri istorioetaz egin duen ikerketa lana presentatuko dauku. Otsailaren 14an: XAMAR jinen da esplikatzera nola bere belaunaldiko gazteek, frankismo bukaeran, bidaia bat abiatu zuten gordea izan zitzaien kultura eta hizkuntza berreskuratzeko. Otsailaren 21ean, Ainhoa INTXAURRANDIETA Gipuzkoako erraustegiaren trahola luzeetan gertatu diren gauza bitxietaz ariko zauku, nola botere politikoa botere ekonomikoaren peko nahi duten batzuk. Otsailaren 28an: Iñaki ETXELEKU, Notre Dame des Landes-ko ZAD-ean kurutzatu hainbat protagonisten lekukotasunak ekarriko dauzkigu.

Laborantza Ganbara ala Laborantxoa Ganbera?

Joan den ibiakoitzean, Ainhizen, laborari batek jakinarazi dauku departamenduko laborantza ganbarak, Donapaleun duen egoitza "Laborantxoa Ganbera" deitu duela (ikus argazkia). Baginakien Euskal Herriko Laborantza Ganbararendako nekeziak izan zirela denboran izenaren pausatzen, Estatuak ez baitzuen izen hori onartzen eta auzian trenkatu zela afera! Aldi huntan gure Ainhizen zen laborariak erraiten zaukun ea Paueko ordezkariek, izen hori emanez, ez dutenez Donapaleuko adarra "Laborantxa Ganberatxoa" erran nahi izan! Dena den, ikusiko Euskal Herriko laborariek hilabete hondar huntan bukatzen diren bozketa horietan nor hautatuko duten: "Laborantza Ganbara" ala "Laborantxoa Ganbera"?

Pagolako pastoralaren lehen errepika

Domingo Garat pastoraleko lehen errepika egina izan da urtarril hunen 12an, ibiakoitzarekin. 70 bat jokolari hurbildu dira, beste hainbat ikuslierren artean. Erritmoan ibiltzea eta lehen kantorearen ikasten hasi dira. Amikuzeko irratian, Amaia Boy arizaleak mustraka nola iragan duen esplikatzen du.

Besteak beste...

Saint Louis zinegelan pasatuko da astearte huntan, urtarrilaren 22an (20:30), "Oreina" euskarazko filma, Koldo Amandoz-ek egina. Bera hor izanen da filmaren ondotik jendearekin solastatzeko.