Euskaraldia prestatzeko bilkura

Amikuzen, Euskaraldia antolatzeko lantalde bat sortu berri da Zabaliken inguruan. Euskaraldia, Korrika bezala, Euskal Herri osoko gertakaria da euskararen garapenaren alde. Euskaraldiak galdegiten dauku gure heinean, 11 egunez baliatzea gure hizkuntza gure artean. Aurten maiatzaren 15etik 25era iraganen da.

Amikuzeko lantaldea programa baten antolatzen hasia da. Joan den astean, dei zabala egin du lekuko elkarteei ekitaldi horretan parte hartzeko: "Euskaraldia eginahala leku publiko eta saltegietan agerraraztea eta animazio batzuen eskaintzea: antzerki, filma, karaoke saio, idazle aurkezpen, Herriko Etxeetako hautetsien bilkurak itzultzaileekin,...".

Hitzordu handiena maiatzaren 16an liteke, ostiral arrastiriz, "Ahobizi" eta "Beharri prest" txapen banaketa pestaren karietara antolatua izanen den ekitaldian.

Hori guzien antolatzeko bilkura proposatua da apirilaren 4an ostiralez (18:30), Zabalik elkartearen lokalean (Iturzainenia etxea, Bithinako bidean, Donapaleun).

"Justizia euskararentzat!" manifa

Zabalik elkarteak dei egiten du elkarretaratze hortan parte hartzera. Huna zabaldu duen mezua: "Intza Gurrutxaga eta Gorka Torre auzipetuak izanen dira, Baionako auzitegian egin zuten tindaketaren ondotik... Auzi horrek bizi dugun injustiziaren egoera latza adieraziko du: Intzak euskara ofiziala den legedia duen lurralde batekoa izanik, itzultzailea ukaiten ahalko luke, Gorkak aldiz euskara ofizialki ezagutzen ez duen legedi batekoa izanik, berriz euskaraz entzuna izaiteko errefusa ukan behar luke. Hizkuntza bera, bi errealitate juridiko, bi zapalkuntza mota, linguizidoa bururaino emateko. Goazen denak gure kexuaren agertzera apirilaren 6an (11:00). Haien justizia injustua sala dezagun!".

Kantaldia Donapaleun

Adin Ederra elkarteko langileen batzordeak, kantaldia antolatzen du ibiakoitz huntan, martxoaren 29an, Donapaleuko zinema (20:30). Hor entzuten ahalko dira Berçaits anaiak, Hiruri, Lea & Anouxka, Debru zaharrak eta Ahoz.

Sartzea 15€; hamabi urtez azpikoentzat 10€.

Taloak, bixkotxak eta edariak salgai izanen dira (19:00).

Amalia elkartearen biltzar nagusia

Amalia elkartea 2021ean sortu da Amikuzen. Tokiko biztanleek osatzen dute jendeen eta belaunaldien artean harremanak garatzeko helburuarekin. Aktibitate desberdinak proposatzen ditu hala nola, joste tailerrak, baratze partekatua, merkatuak... Haurren eta burasoen arteko harremanak ere landuak dira.

Azken biltzar nagusia berrikitan iragan da. Gaur egun 200 kide elkartzen ditu eta 30 bat boluntarioek animatzen dituzte Amaliaren lan taldeak, Laure Claverie, langilearen laguntzarekin. Diru iturriak CAF egiturak eta Departamenduak segurtatzen dituzte elkarteko kideekin.

Huna zoin diren elkartearen arduradunak:Jean-Michel Lartigau eta Nadine Urrutiaguer-Recalde (lehendakariorde), Peio Etchepare (diruzain) eta Fanny de Turckeim (idazkari).

2025eko helburu nagusietako bat laguntzaile berriak atzemaitea izanen da, baita gazteen komisioa eta baratzea garatzea ere. Departamendutik heldu diren diru laguntzen murrizteko arriskua aipatua izan da biltzar nagusian.