Libertimendua

Hazparnen iragan da aurtengo azken Libertimendua. Gaitzeko arrakasta ukan du. Erran behar da dena ederki prestatua zela: dantzariak, antzerkilariak eta bertsolariak. Miren Artetxe eta Mizel Mateoren bertsoak finak eta lagungarriak izan dira gazteek irudikatu eta aipatu gai guzien ulertzeko.

Hala nahas-mahas eta zonbait ahantziz zer gai aipatu den; baziren Hazparne aipatzen zutenak bainan ere auzo herriak: Puyo agentziak galdu telekomandak eragin arrastatzeak, Aiherran egin tagak eta hango auzapezaren kexu gorria, Super Peio Auxotearen salbatzailea, Lauak lantegia gerla tresna sortzailea, Hazparneko bideo-zaintzale selekzioa, kaperaren erabilpen etengabea, Le Pen-en heriotza bainan oroz gainetik gure herrietan eskuin muturrak egiten duen emendatzea, eskola giristinoetan gertatu gauza itsusiak... eta beste. Bazen orotarik, denak egiak eta molde irringarrian eta trufakorrean aipatuak. Ondotik gaitzeko bazkaria egin da ezkerparetan, giro ezin hobean.

Biba zuek gazteak eta heldu den urte arte!

Erakusketa Pierre Espil mediatekan

Georgia Niekrasz andereak tindu anitz sortu ditu Gaïaren mitoaren inguruan. Egun hauetan mediatekan erakusketa bat bada "Gaïasismo" edo "Natura mugimenduan" deitu duena. Obrei esker natura eta gizakiaren arteko lotura ikertzen du, inspirazioa bere euskal eta eslaviar erroetan aurkitzen duela. Lurraren indarra eta denbora berean ahulezia erakusten du bizi ororen ama den Gaïaren mitoa erabiliz.

Artistarekin hitz egin nahi bada apirilaren 2an edo 5ean joan behar da mediatekarat (14:30-17:00). Bestenaz erakusketa mediatekaren zabaltze orduetan ikus daiteke, kitorik.

Hazitegia Espil mediatekan

Landare eta hazi trukaketa apailatua da mediatekan aurten ere. Ez da diru istoriorik: har eta emaiten da. Baratze haziak, loreak, landare aromatikoak, zerealak, zuhaitzak eta zuhaixkak uzten ahal dira. Haziak gutunazal batean ezarri beharko dira eta mamutxa kaltegarririk ez hedatzeko, haziak 24 orenez hormagailuan utzi behar dira (aste bat lekadunentzat).

Bethi Gazte

Hola deitzen den adinetakoen batasunak urteko biltzar nagusia egin du duela zonbait denbora. Eraman ateraldi eta ausagailuen itzulia egin eta, bulego berriaren hautatzeko ordua etorri da eta izan da aldaketa: lehendakari Monique Luberriaga; lehendakariorde Marie Françoise Durruty, idazkari Marie Bareille Dihartce; idazkariorde Françoise Claudepierre; diruzain BeÅ'ˆat Saint Esteben; diruzainorde Claudine Curtet.

Urte hastapen huntan bildu dira jadanik kausera jateko eta programa aberatsa muntatua dute urte guzirako.

Eñaut Etxamendi mediatekan

Apirilaren 19an (10:00), Eñaut Etxamendiren obretan bidaiatuko da, "Azken elurra", "Gilentegiko Gilen", kantu, olerki,... Idazlea bera presente izanen da. Antolatzailea HAIK da, Hazparneko mediateka partaide duelarik. Ongi etorri deneri!