Herriz Herri - Makea (L) | 2025eko Urtarrilaren 16a
Euskal Pilota Selekzio baten alde
Joan den larunbatean Euskal Pilota Selekzioak egun osoko egitaraua antolatua zuen. Goizarekin 30 bat pertsona, gehienak pilotari gazteak, bildu dira. Euskal Selekzioaren alde eraman borrokak eta gertakariak oroitaraziak izan dira. Gogoratu da, azken urte hauetan Ipar Euskal Herriko pilotari batzuk bildu zirela, “Euskal Selekzioa orain!” lemapean. 15 pilotarik, 2024an, frantses pilota federazioari uko egin diote. Biltzar nagusian errana izan da, Ipar Euskal Herriko eta Nafarroako pilotariek Euskadiko federazioan jokatzeko ahala ukan dezaten behar diren urratsak egin behar direla. Pilotako kluben eta elkarteen itzulia eginen da. Gazteriari buruz kolegioetan, lizeoetan… sentsibilizazio lana eramana izanen da. Ondoko egunetan Herria astekariak xehetasun gehiago emanen ditu.
Bertsu bazkariak segida hartu du 100 bat jende hurbildu da, arratsaldean bereziki haurrentzat animazio desberdinak antolatuak ziren, Pontx pailazoak ere Euskal Selekzioaren alde ikusgarria eman du, haurrak xoratuak zirela! Bi pilota partida ederren ikusteko plazera ukan dugu, lehenean palan neskak arizan dira, bigarrenean gizonak esku-huska. Eguna bururatu da kontzertu batekin.