Thomas Ospital, kontzertuan agorrilean, Belokeko komentuan

Thomas Ospital, 36 urteko aihertar artista musikaria, organo joilea, Pariseko Saint-Eustache elizako organo-joile titularra da 2015etik. Mundu guzian ezaguna da, herriz herri, erresumaz erresuma baitabil kontzertuak emaiten, hala nola azken denbora hauetan, Parisen berean, Gloucester herrian (Ingalaterra), Copenhague (Danimarka), Donostia, Strasbourg, Alemaniako St Peter eta Stralsund eta Lucerne (Suitza). Agorrilean Belokeko komentuan lehen aldikoz antolatuko den “Beloken Musikagauak” festibala iraganen da Thomas Ospitalen gidaritzapean.

Karia huntara, 3 kontzerturen ikusteko parada proposatua zauku, agorrilaren 8an (20:00) larunbatarekin Thomas Ospital (organoa) eta Romain Leleu tronpetista, agorrilaren 13an (20:00) ortzegunarekin Charles Balayer (organoa) eta agorrilaren 16an (18:00) igandearekin, Thomas Ospital eta Dulci Jubilo (abesbatza).

Festibal berri hunen helburua arras sinplea da: musikaren bidez toki berezi hau berriz biziaraztea, anaitasun izpirituarekin. Tokiak mugatuak izanez, hobe haatik aitzinetik hauen erreserbatzea (Hello asso), edo turismo bulegoetan. Sartzea 20€ (prezio osoan) eta 15€ (prezio apalean).

Laurendi eta Mikelek finalerdietan galdu

Frantziako pilota txapelketaren kondu 2 finalerdi iragan ziren (artekoak), joan den ortziralean, Aiherrako plazan. Euskal Herriko txapeldunak diren Abarratia elkarteko Laurendi Oihenart-Etxart (hau Theo Etcheverryren ordez) eta Mikel Harguindeguyk gaitzeko partida eginik (partidak 2 oren pasa iraun du) 30 eta 26 galdu dute Zaharrer Segiko Eneko Eyherart eta Iban Saldubehereren kontra. Zaharrer Segikoak partida guzian aitzinean izanik, hondarrera Abarratiakoak hurbildu zaizkie, baina ez aski. Lau pilotariak gorestekoak dira holako partida ederra eginik, leher eginak ziren. Esperientzia ona Laurendi gaztearentzat bera baino zaharragokoen artean, bere tokia ederki atxikirik.

Bigarren partidan, bi ekipak elgarren betean ziren. Azkenean Noizbait-eko parea (Unai Pagueguy eta Thomas Sahasquet itsasuarra) nagusitu da 30 eta 25 Itsasuko Antton Daguerre-Larraburu eta Lukian Richepin-en aurka. Partidak oren bat eta laurden iraun du. Finalean, baigorriarren aurka ariko dira, Baigorriko plazan agorrilaren 11n.

Kasu: uraren erabilpena murriztua da

Berote eta idortearengatik errekako urak arras apalduak eta lurpeko erresalbuak ttipituak izanki, Prefetak hartu erabakiaren ondorioz, galdatua zauku ur edangarriaren erabilera mugatzea, baratzeak eta loreak egunaz ez ureztatuz (8:00-20:00), autoen garbitzea bazterrera utziz, halaber pizina handien betetzea. Horrela lehentasuna emana zaie suteen defentsari eta abereen ureztatzeari. Xehetasun gehiago aurkituko duzue aiherra.eus webgunean. Anartean, euri xorta on bat eginen duelako esperantzan gaude denak.