ELA, LAB eta ESK sindikatuek Mercedes-Benz enpresa salatzen dute. Honek Gasteizen duen lantokian tenperatura gorei buru egiteko neurririk hartu ez duela leporatzen diote. Sindikatuen hitzetan, “langileen osagarria arrisku larrian” jarri du enpresak. Ondorioz, “ingurumen baldintza egokiak” ziurtatzeko eskaera egin diote Mercedes-Benz enpresako zuzendaritzari.

Euskal enpresarientzat “ez da arazorik negoziazio-mahaietan euskaraz aritzeko”. Tamara Yague Araba, Bizkaia eta Gipuzkoako enpresari elkarteko presidenteak horrela erantzun zion ELAk eta LABek euskara hutsean negoziatzeko duten asmoari: “Guk ez dugu inoiz arazorik ukan euskaraz negoziatzeko baliabideak jartzearekin. Mahai askotan euskarazko hartu-emana dugu”. Yaguek azpimarratu zuen Confebaskek ez duela arazorik euskaraz aritzeko negoziaketan, betiere mahaiko kide guziek uler dezaten baliabideak jartzen badira.

Imanol Pradales Eusko Jaurlaritzako lehendakariak Espainiako selekzioan dabiltzan euskal taldeetako jokalariak zoriondu zituen joan den astean, Espainiako Selekzioarekin Munduko Futbol Txapelketa irabazi dutela eta. Jokolari horietan dira Mikel Oyarzabal, Unai Simon, Martin Zubimendi, Iñaki Williams eta Aymeryc Laporte.

Bere aldetik, Maria Chivite Nafarroako presidenteak Mikel Merino jokolaria eta Javier Lopez Vallejo kirol psikologoa hartu zituen joan den asteartean Nafarroako Jauregian Gobernuburuaren bulegoan lehenik eta Nafarroako Jauregiko balkoitik agurra eginik ondotik.

Oroitu behar da Euskal Selekzioaren aldeko manifestaldiak izan zirela Euskal Herriko hiriburu gehienetan Espainiako futbol Selekzioak Munduko Txapelketako Finala jokatzen zuen egunean. Aldi berean, Espainiako selekzioaren partidua pantaila handian hedatua...

Donostiako Karmengo bestetan hainbat istilu izan ziren gazteen eta polizien artean, joan den astean. Lau gazte larrialdietara eraman zituzten, eta beste hainbat “kolpe handiekin” etxeratu ziren. Igande arratsean egin zien eraso Ertzaintzak; ordurako besta eremua hetsia zela.

Karmengo besta gunean “giro sanoa” zela kontatu dute gazteek, haatik, egoera bestelakoa zen txosnagunetik kanpo. Hain zuzen, Eusko Jaurlaritzako Segurtasun Sailak biharamunean jakinarazi zuenez, egun horretan talde bat Espainiako jarraitzaileak beldurtzen ari zen, Munduko Futbol Txapelketa irabazi ondoan, Alde Zaharrean. Egoera horren aitzinean, Ertzaintzak 7 lagun identifikatu zituen eta erasoan parte hartu zuenetako bat atxilotu zuen, agintaritzaren agenteen aurkako atentatua egotzita.

Ertzainak Donostiako Karmengo besta eremura gazte batzuen gibeletik jin ziren eta “konturatu ginenerako liskarra hasia zegoen, eta gazteak...

Espainiako Auzitegi Nazionalak absolbitu ditu 2022ko martxoan Ibai Aginaga euskal preso ohiari ongietorri ekitaldia egiteagatik auzipetuak ziren hamasei pertsonak. Terrorismoaren gorazarre delitua egozten zieten, eta epaiketa joan den ekainean izan zen, Madrilen. Fiskalak bi urte eta bi urte eta 9 hilabete arteko espetxe zigorrak eskatu zituen auzipetu bakoitzarentzat, baita 15 urteko inhabilitazioak eta 5.100 euroko isunak ere. Aldiz akusazio partikularrek – Dignidad y Justicia, Vox eta Fundacion Villacisneros delakoek – 3 urteko presondegi zigorra eskatu zuten bakoitzarentzat. Defentsak, bere aldetik, absoluzioa eskatu zuen, eta azkenean epaileak ontzat hartu du eskaera hori. Akusatuek ekitaldia pribatua izan zela defendatu dute uneoro eta auzia eskubide politikoen inguruan kokatu dute.

Urtero bezala, Bermeok, Elantxobek eta Mundakak urteko egun bereziena bizi zuten joan den astean, Madalena egunaren karietan. Itsas prozesioak eta Izaro uhartearen inguruko ohiturak milaka lagun bildu zituen urtero bezala Busturialdean, eta besta giroa nagusitu zen hiru herrietan. Urteroko ohiturari jarraituz, Bermeoko itsasontziak Izaro uharterantz abiatu ziren eguerdian, eta bidean herriko auzapezak teila bat bota zuen itsasora, “Honaino ailegatzen dira Bermeoko itoginak” aipaldi famatuaren bidez uhartearen jabetza Bermeorena dela aldarrikatzeko.

Kondairak dioenez, Bermeok estropada batean irabazi zion Izaroren jabetza Mundakari, eta orduz geroztik urtero errepikatzen da keinu sinboliko hori. Teila itsasora bota ondoan, udalbatza Elantxobera eta Mundakara abiatzen ohi da, usaiari jarraipena emanez.

David Murrayk eta Joe Lovanok Donostiako Jazzaldia saria eskuratu zuten joan den uztailaren 23an, Donostiako 61. jazzaldiaren karietan. David Murrayri buruz azpimarratzen ohi da mende erdiz arizan dela jazz modernoaren soinuari forma ematen: ausarta, sortzailea, tradizioan errotua, baina betiere mugak gainditzen dituela. Bere izenpean 200 musika album baino gehiago argitaratu ditu, hainbat artistarekin elkarlanean. Gaur 70 urte ditu eta Jazzaldiaren sariak haren birtuosismoa sariztatu nahi izan du.

Bestalde, Joe Lovano saxofoi-jotzailea funtsezko figura da jazz garaikidean, eta haren ibilbidearen ezaugarri bereizgarria sonoritate berrien etengabeko bilaketa da....