Euskal Herriko Laborantza Ganbarak (EHLG) urriaren 12an abiatu du diru biltze kanpaina, azaroaren 22a arte. “Ama ura zaindu” lelopean, uraren zaintza eta laborantzaren egokitzapena ezarriko ditu gogoetaren erdigunean. Gai bera landuko du azaroaren 6tik 8ra antolatuko duen Lurrama saloinean.

2026ko udako bero handiek, idorteek eta ur eskasiak etxaldeak gogorki hunki dituzte, artalde eta tropak ur eta bazka eskasian utziz. Egoera horren aitzinean, ekoizteko moldeak berriz pentsatu behar direla azpimarratzen du EHLGk. Elkartearen ustez, laborantza herrikoiak bidea eskaintzen du elikagaiak ekoizten segitzeko, baliabide naturalak zainduz.

Lurra babestu, ura atxikitzeko

Uraren eta lurzoruaren arteko lotura da lan horren oinarrietarik bat. Lur bizi eta egituratu batek euri-ura atxikitzeko eta iragazteko gaitasun handiagoa du. Horregatik, EHLGk laborariak laguntzen ditu landare-estalkiak eta alorren errotazioak plantan ematen, lurra biluzik ez uzteko, higadura mugatzeko eta emankortasuna zaintzeko. Ur eskasiari egokituak diren espezie eta barietateak hautatzea ere sustatzen du, hala nola ekilorea edo sorgoa.

Laguntza horrek bertze hainbat arlo hartzen ditu: hesi eta arbolak landatzea, biodibertsitatea indartzeko; euri-urak berreskuratzeko sistemak ezartzea; eta dirulaguntza publikoak eskuratzeko urrats administratiboak egitea. Berriki, fruitugintzan eta baratzezaintzan bi teknikari lanpostu sortu ditu, tokiko elikadura beharrei erantzuten dieten ekoizpenak laguntzeko.

Elkarteak erronka kolektiboa ikusten du horretan: ur kontsumoa murriztea, elikagaien ekoizpen iraunkorra segurtatuz. Iparraldeko elikadura segurtasunaren arabera ureztatu beharreko alorrak lehenestea proposatzen du.

Laborarien lekukotasunak eta sostengu deialdia

Sei asteko kanpainan, Sabina Hourcadek egin lau bideo labur zabalduko dira EHLGren sare sozialetan. Hazle, baratzezain eta zereal ekoizleen bidez, ura xuhurki erabiltzeko eta lurzorua babesteko eguneroko praktikak ezagutaraziko dituzte.

Kanpainak elkartearen jarduerak iraunarazteko baliabide ekonomikoak bildu nahi ditu. Gaur egun, 800 emaile baino gehiagok, partikularrek eta enpresek, sostengatzen dute EHLG. Oinarri hori sendotu eta laguntzaile berriak bilatzen ditu. Laguntza banku biramenduz egin daiteke ehlgbai.org webgunetik, baita eusko biramenduz edo txekez ere. Emaileek emaitza agiria eskuratzen ahal dute, baita Izar Lorea aldizkariaren urteko bost zenbakiak etxean errezibitu ere.