Ikusi Mikusi

Urriaren 9 eta 10ean iragan da Ikusi Mikusi azoka. Ikustekoa zen ortziralean bildu haur andana, Euskal Herriko alde guzietarik etorriak, Iparraldetik zein Hegoaldetik. Denbora goxoa pasatu dute 1.400 bat haurrek, joan den urtean baino gehiagok. Herriko gela guziak beteak ziren. Larunbatean, haur horien burasoak ere hurbildu dira, ez denak, bainan andana ederra, azokaren ikusteko eta liburu batzuen erosteko.

Uso besta

Uso besta ezeztatua izan da, ostatu bateko nagusiak AVC bat ukan baitu eta ospitalean baita. Hari sustengua adierazteko hartu dute erabaki hori. Hala ere, bertze ostatuetan usoak jateko aukera izan da: plazan bazkaldu ordez, jatetxe bakoitzaren gelan bazkaldu dute. Kuraia on eriari, eta espero dugu fite berriz ikustea bere ostatuan.

Kirolak

Pilota – Esku-huska trinketean, lehen mailan: Iribarren Unai-Lecuona Aritz irabazle, 40-19, Denek Baten kontra. Etxeberri Pacheco Manex-Zozaia Eñaut galtzaile, 40-24, Zaharrer Segiren kontra. 3. mailan: Alfaro Ellande-Irazoqui Iñaki galtzaile, 40-38, Abarratiaren kontra. 4. mailan: Elizalde Lauran-Etxabide Olazabal Beñat galtzaile, 40-38, Azkaindarraken kontra.

Neskak palantxaz trinketean, 3. mailan: Indaburu Gaelle-Arotzarena Amaia galtzaile, 40-32, Denek Baten kontra. 4. mailan: Urrezti Leire-Etxeberri Pacheco Laida galtzaile, 40-38, Denek Baten kontra. Gazteak: Endara Elorri-Barreneche Astigarraga Intza galtzaile, 40-6, Kapito Harriren kontra.

Errugbia – Sarak 44-14 galdu du Billère-Lonsen kontra. Heldu den igandean Nafarroa taldearen kontra jokatuko du.