Ezkontza

Urriaren 17an ezkondu dira Maritxu Haramboure Sarhiko alaba eta Angello Carceller. Bi herritarren arteko ezkontza hau osoki herrian iragan da; lehenik Herriko Etxean Frederic Camou auzapezaren aitzinean elgarri hitza emanik gero, Izturitzeko elizan bildu dira familiako eta adixkidez inguratuak Xipri Arbelbide apezarekin beren ezkontza finkatzeko. Eztei ospakizun afaria ere uda huntan osoki berritua izan den herriko gelan zuten. Behingoan Izturitzen biziko diren ezkondu berriei goresmenak, agiantza zoriontsuenekin beren bizirako.

“Izturitze rando” urriaren 25ean

Erberua elkarteak urte guziz antolatzen duena, heldu den igandean beharra dugu. Izenak 7etatik goiti hartuko dira Harpealde trinketaren aitzinean (7:00), fite abiatzeko (7:30-8:00).

-Mendiko txirrindulaz (VTT) 3 ibilaldi: 25, 30 edo 40 kilometrokoa.

-Oinezkoentzat 2 ibilaldi: 12 edo 20 kilometrokoa.

Izen emate sarian (10 euro) barne dira: kafea abiatu aitzin, bideko janari edariak, dutxak, kartxerra eta aperitifa. Ibiltari bakoitzarentzat euro 1 emanen zaio minbizia duten pertsonak laguntzen dituen “Goxa Leku Etxea” elkarteari. Lekuan berean bazkaltzen ahalko da ere. Argitasun gehiagorentzat: erberua@gmail.com.