Heriotze

Augustin Bordako Janbattitt Espil pausatu da 91 urtetan. Asteazkenean ziren ehorzketak. Dolumin bizienak Marie Louise emazteari, Jean René, Christian, Roger semeei eta familia guziari.

Huguette Garces (Pereira Da Cunha sortua) Baigorriko erretreta-etxean zendu da 81 urtetan, joan den astean. Ehorzketako meza gure elizan iragan da eta Bigorre eskualdeko Pierrefitte herrian lurperatu dute. Doluminak familiari.

Mugaz gaindiko jardunaldia

Aro zirtzila izanik ere, mugaz gaindiko egunaldia ederki iragan da Eugin joan den ibiakoitzean, gure ibarreko jende andana baten parte-hartzearekin, Urepele, Aldude, Banka eta Baigorritik joanik, eta hauekin Esteribar, Erro eta Baztangoak. Joko, bazkari (Menditarrak taldeak alaiturik) eta musikaldi, denak giro biziki goxoan joan dira. Errepikatu beharko den besta-egun bat izan da.

Pilota

“Herriarena” eta “Maite Haran” trofeoak joan den aste hondarrean hasi dira Baigorriko trinketean.

Andereen palantxa lehiaketako emaitzak:

Haize Oçafrain-Housset 40 / Amestoy-Tehexa Oçafrain 26

Arrosagaray-Marisco 40 / Heguy-Naia Oçafrain 26

Esku-huska, gizonetan:

Etcheberria-Larre 40 / Mariluz-Etcheverry 30

Ziarrusta-Ugarte 40 / Teillery-Luro 22

Finalak igande goizean izanen dira (urriaren 25ean):

Palantxa: Oçafrain-Housset / Arrosagaray-Marisco (10:00)

Esku-huska: Etcheberria-Larre / Ziarrusta-Ugarte (11:00)

Ondotik bazkaria izanen da, 35 eurotan. Erreserbatzeko: 06 15 51 48 30.

Kliska

Argazki-festibala ibiakoitz eta igande hauetan (urriaren 24an eta 25ean) iraganen da Plaza Xokon. Argazkilari profesionalen eta margolari amaturren obrak erakutsiko dira. Izanen dira ere ibilaldiak, jokoak haur eta familientzat, tailer desberdinak, filmak, denak kitorik. Tailer eta ibilaldientzat hobe da izenak aitzinetik ematea CPIEri.

“Zaldi bat”

Urriaren 28an (asteazkenez), Maddi Ane Txoperena idazleak “Zaldi bat” liburua aurkeztuko du. Bere hirugarren eleberria da. Saran sortua, Lesakan bizi, Euskadi saria irabazi du obra horri esker. BOGA (Baigorri, Ortzaize, Garazi, Aldude) irakurle-taldeak du gomitatzen, Euskal Kultur Erakundearen laguntzarekin. Denak gomit gira, ez baldin badugu liburua leitua ere, irakurtzeko gogoa emanen baitigu Maddi Anek. Bixentan izanen da (19:00).