Heriotze

Antxordokiko Asuncion Amestoy, sortzez Jaimerena Borda, zendu zaigu 93 urtetan. Aritzakungoa zen, Berekotxeko Bordakoa. Hamabi haurride ziren, sei neska eta sei mutiko. Anaietarik lau Ameriketara joan ziren, bat Txilera, bat Argentinara eta biga Amerikar Estatu Batuetara. Haurride guzietarik gaur bi gazteenak dira gelditzen, Kuli Itsasun eta Soledad Bidarrai Ondikolan. Gaztetan Noblianera etorri zen Asuncion neskato gisa. Antxordokiko Pialerekin ezkondurik, lau seme-alaba ukan zituzten, Jean-Pierre, Xan, Véronique eta Dominique, bai eta sei haur ttipi, Franck, Ximun, Elena, Elorri, Amaia eta Emma, eta ondotik hiru arra haur-ttipi. Maluruski Asuncionek eta Pialek bi seme galdu zituzten gazterik eritasunez, Jean-Pierre 35 urtetan 1993an eta etxaldearen segida hartua zuen Xan 47 urtetan 2006an. Kolpe gogorrak Asuncion eta familiarentzat. Piale senarra aldiz 2018an zendu zen. Emazte diskreta zen, eta fede handikoa, nahigabe horien jasaiten handizki lagundu dukeena. Agorril bukaeran eroriko bat eginik, Izpurako arta etxera eremana izan zen eta han da pausatu. Azken agur kartsua eskainia izan zaio, ahaidegoan den Beñat Amestoy apezaren inguruan, Franck eta Ximunek amatxiri buruzko lekukotasun beroa zabaltzen zutela. Hemendik ere gure atxikimendu osoa doala familia guziari.

Mus lehiaketa

Eskola publikoko burasoen elkarteak mus lehiaketa antolatzen du azaroaren 21ean, larunbat arratsaldez, Artetxea gelan: izen emaitea (12€) sms bidez (06-18-96-66-70) edo tokian berean (14:00), lehiaketaren abiatzea (15:00). Sari anitz irabazteko, garaileek 500€, finalistek 250€. Talo salmenta ere izanen da (18:00), tokian berean jateko edo etxerat eramaiteko.