SAN FRANTZISKO. 50 urte dira Ferrando Aire 'Xalbador' zendu zela eta ez dute xantza iragaiten pasatu nahi izan Kaliforniako euskaldunek. Behar da gogoan atxiki Xalbador eta bere familia lotura handikoak direla Diasporarekin eta haren aitatxi-amatxik Kalifornian ezagutu zutela elkar bertan emigrante izanik, ondoren itzultzeko; Xalbadorren seme Mixel bera artzain arizan zela Kalifornian; familia franko badutela oraino AEBn; eta San Frantziskoko Basque Club Euskal Etxearen sortzea zuzenean lotua dela Xalbador eta Mattinek hirira egin bisitan gertatu zenari, erran nahi baita euskal kluba oraino ez zelarik, euskaldunak frantses elkarte bateko kide baitziren eta bi bertsolariok kantuz zirela mikroa kendu baitzieten euskaraz kantatzearen karietara, euskaldunak zinez samurtu eta hura berriz errepika ez zedin sortu zela euskal kluba sortzeko deliberoa. Biziki maite ukan dituzte beti San Frantziskoko Euskal Etxean Xalbador eta bertsolaritza.

San Frantziskokoa Estatu Batuetan bertso-aktibitate gehien duen euskal etxea izanen da hain segur AEBn eta Diaspora osoan. Heldu den ebiakoitzean, urriaren 24an, 'Xalbador gogoratuz' jaialdia eginen dute hirian poeta urepeldarraren oroigarri, EHko eta bertako bertsolariez. Gure Euskal Etxera Andoni Egaña eta Sebastian Lizaso bilduko dira Euskal Herritik, eta AEBtik Martin Goicoechea, Oier Pastor eta Nerea Eceiza-Arregui. Gai-jartzailea, Mikaela DePoyster Goikoetxea gazte euskal-amerikarra izanen, eta aurkezle eta ingelesera moldatzaile Xabi Paya. Baina bertso saioaz gain, Aire Ahizpak hirukoteak (Xalbadorren bilobak) afari-kontzertua emanen du aitatxi omenduz, Sebastian Desgrans akordeoi-jotzailea lagun. San Frantziskoko hitzorduaren biharamunean, urriaren 25ean, igandea, Chinon errepikatuko dute bisita bertsolari eta kantariek, eguerdiz Euskal Etxean antolatu bazkari eta emanaldian.

ZUZENEAN ONLINE. Larunbatean San Frantziskoko ekitaldiak segitu nahi dituenak, esteka hauetan egin ahal izanen du: bertso-saioa, sfbasqueculturalcenter.org/events-page/nabo-bertso-saio-xalbador-gogoratuz helbidean. Eta Aire Ahizpen saioa, hemen: sfbasqueculturalcenter.org/events-page/aire-ahizpak-2026. Kasu tenoreekin, bertso-saioaKaliforniako 16:30ean izanen baita (Euskal Herriko igande goizaldeko 1:30ean hasiz). Eta Aire Ahizpena bertako 20:50ak irian (EHko igandeko goizeko 5:50ean). Guzia San Frantziskoko Euskal Etxea, Gure Euskal Etxea, BEO eta NABO lagun antolatua.