Badu urteak eta urteak Zokoako gotor-lekua, hamazazpigarren mendean eraikia, Ziburuko lurretan dena, solasgai dela hor gaindi. Nork zer egin toki hortan, jakinaren gainean toki ederrean dela segur bainan berenaz arras eraikin berezia eta deusik ez nola nahika aldatzen ahal. Alde batetik, arrunt itsas-hegian da eta behar du itsasaldetik untsa gerizatua izan sail huntan berean beste toki batzuentzat idatzia den bezala. Bestetik, bera ere andeatzen ari zen eta aitzina andeatzen ari da. Euskal- Elkargoak beretua du gora-behera frangoren ondotik eta aspaldian egitekoak ziren obreri plantatua da hilabete huntan, eraikin guzia planta hobean ezartzeagatik. Dena aterbean. Ba omen da urte bat eta erdirena nunbait han. Eta gero zer eginen da gotor-leku hortan? Behin aipatu da ikastegi berezi bat hor jartzea mugaren bi aldetako gaiak gogoan, besteak beste itsasoari lotuak ditazkeenak. Orainokoan deusik ez da haatik trenkatua eta itxura guzien arabera nehork ez du presa handirik agertzen, herriko bozetarik landa ikusiko dela. Zernahi gisaz aski toki balitakea ikastegi batentzat? Artetan aipu da ere itsas-erakustegi baten hor muntatzea bainan hori aipatu orduko ere horra hor toki eskasaren arrangura.