Ugutz Robles-Arangiz-en heriotza

Euskal Herri osoan ezaguna zen Ugutz Robles-Arangiz, joan den astean 83 urtetan hil da. Ugutz anitz plazetan arizan da istorio kondatzen, umoregile ezaguna zen. Jatorriz familia bizkaitarra bazen, aita Manu Robles-Arangizek ihes egin behar ukan zuen eta Ugutz 1939an Iparraldean sortu zen, hamaika haurrideko familiako bederatzigarrena zen. Familiak bere ohantzea Beskoitzen eraiki zuen, Leku Eder etxean. Ugutz-ek Amalur ostatua atxiki zuen, Estitxu arreba kantaria zenarekin animazioak egiten zituztela.

Euskaltzale amorratua, kantagintzan, antzerkian eta dantzan anitz urtez arizan da. "Beskoiztarrak" antzerki taldean parte hartu zuen eta lehen urtean Sorginak Etxaburun lana eman zuen. "Euskal Antzerkilarien Biltzarreko" sortzaileetatik bat izan zen.

Dolumin sentikorrak Robles-Arangiz familia guziari.

Oskarbi eta Mattin Lerissa kontzertuz

Oskarbi talde mitikoaren kantaldia Bixintxo gelan maiatzaren 28an (20:50) iraganen da.

Oskarbi taldea 1966an sortu zen. Ez Dok Amairu mugimenduan parte hartu zuen. Hasierako urteetan, askotan izan zen Oskarbi Iparralde huntan, kantaldiz kantaldi (Hendaia, Atharratze, Aldude, Donibane Lohizune, Uztaritze, Hazparne, Miarritze, Baiona eta beste hainbat tokietan).

Diskografia aldetik, 12 disko grabatu ditu taldeak, gutienez 6 CD 2000 eta 2021eko urte artean.

Eta Beskoitzen... Azken CDa, "Kantua zuei", joan den abenduan atera dena, lehen aldikoz Beskoitzeko Bixintxo gunean aurkeztuko du. Egungo Oskarbi, 9 kantari-musikarik osatzen dute, boz miresgarriak pianoz, esku soinuz, gitarraz, flautaz, bibolinez lagundurik eta apaindurik.

Bai eta Mattin Lerissa bere musikariekin... Ttipitatik izan du behorlegitarrak kanturako zaletasuna, dagoeneko ibilbide oparoa du Lerissak, izan ere, hainbat kantaldi eta kontzertu eskaini ditu. Bi disko atera ditu orain arte, "Bidez bide" 2016an eta "Gazte naiz gazte" 2018an. Lehen diskoan gehienbat kantu herrikoiak landu bazituen, berak osatutako sorkuntzak dira bigarren diskoko kantuak. Hitzak, hainbat poeta eta idazlerenak ditu: Manex Pagola, Pantzo Hirigarai eta Daniel Landartenak, besteak beste. Folk musika egiten du Mattin Lerissak, eta ahots eztiz eta kantaera dotorez mintzo da bere kantuen bitartez, gaztetasunari, herriari, transmisioari edo(ta) amodioari buruz. Taula gainean haren ondoan ukanen ditugu: Mixel Ducau (gitarra), Matthieu Haramboure (gitarra apala) eta Sébastien Desgrans (eskusoinua).

Huna beraz hutsezineko hitzordua, Leizarraga elkarteak antolatzen duena, Bixintxo gunean. Sartzea 10€tan.