Okindegia berriz irekia

Zenbait hilabetez hetsirik egonik, Aiherrako Gozategia okindegia joan den astelehenean berriz ireki da. Hazparneko “Ogi bihia” okindegiak du segida hartu, obra batzu egin ondoan. Berri ona dudarik gabe, herritarrek tokian berean ogia erosten ahalko baitute. Okindegia egun guziz irekia da, astelehenetik ostiralera goizetan (6:30-12:45), arratsaldetan (16:00-18:30) eta asteburuetan (6:30-12:45).

“Ogia Bihia”, Hazparneko Bidart familiaren historia da, jadanik hiru belaunaldiren inguruan kontatzen dena. Beñat sortzailea, bere semea Adrien eta orain Christophe eta Sébastien, lehena fabrikazioaren arduraduna da eta bigarrena kudeaketarena. Gaur egun 30 langilek lan egiten dute, 28k Hazparnen eta bik Aiherran. Antolakuntza berriaren arabera, Aiherran ogi biologikoa eginen dute eta Hazparnen gaineratekoa, bixkoxtegia barne. Haatik, Hazparneko eta Aiherrako 2 saltegietan denetarik erosten ahalko da.

Aiherrako okindegia ireki aitzin, joan den ostiralean bildu ziren enpresako langile gehienak, lantoki berriaren bisitatzeko eta hurrupaldi batekin hunen irekitzea ospatzeko. Auzapeza ere gomitatua zen. Bide on bat opatzen diogu.

Martxoaren 25ean Itsasutik Aiherrara oinez

Badu zonbeit hilabete aipatu genuela Aiherra eta Antzuolako 2 herriak proiektu berri bat prestatzen ari zirela. Hau da mendiz mendi eta herriz herri, oinez eta mendiko bizikletetan bi herrien juntatzeko ibilbide baten sortzea. Proiektua kasik bururatua da, ondoko egunetan aurkeztuko baitute.

Ondorioz, Mugak Zubi aplikazio berri baten bidez bakoitzak hautatzen ahalko du nahi duen ibilaldia egitea, eta hori nahi duenean. Helburua da maila ertaineko ibiltari orok (etapa guziak 20km petik dira) etapa bat edo gehiagoren kurritzeko parada ukaitea kartaren arabera, ingurumenaren deskubritzeko denbora izanez, etapa bakoitzak 4/5 orduko iraupena duelako.

Anartean, aihertarrek eta antzuolarrek laster ukanen dute elkarrekin ibiltzeko aukera, 2 ateraldi programatuak baitira. Martxoaren 25ean larunbatarekin lehenik Itsasutik Aiherrara eta apirilaren 2an, igandez, Legazpitik Antzuolara. Lehen ateraldiari doakionez, Itsasuko eliza ondotik abiatzea eginen da (9:00).