“Bizi Filmak” Itsas Mendi zineman

Etxepare lizeoak eta Iparra-Hegoak Bizi Filmak izeneko euskarazko filmen emanaldia antolatu dute hilaren 17 eta 18rako, Itsas Mendi zineman. Martxoaren 17an, ostiralarekin (19:00), honako dokumentalak emanen dituzte: “400 ordu”, “Seaska, ikastolaz haratago” eta “Irlak” eta segidan honako film laburrak: “Azken emanaldia”, “Eskeip-Geim” eta “Ainarak”. Sartzea urririk. Martxoaren 18an, larunbatarekin (11:00), honako filmak emanen dituzte: “Erraiak” (33’) eta “Bi arnas” (58’). Sartzea: 4 euro.

Tokiko Elikaduraren Astea

Hilaren 6tik 12ra Tokiko Elikaduraren Astea herrian izanen da. Hilaren 10ean, ostiralarekin (19:30), film bat emanen dute Itsas Mendi zineman, film horretan laborantza biodinamikoan aitzindari diren emazte mahastizainen lana aztertuko da. Hilaren 11n, larunbatarekin, herriko merkatuan “Hazien Txokoa” izanen da, haziak laborarien artean elkar trukatzeko. Martxoaren 12an, igandearekin, salda-dantza izeneko ekitaldia, hau da, salda bat dastatu musika entzunez. Ondotik Barazki-Rapa eskoletako haurren eskutik. Antolatzaileak: Biharko Lurraren Elkartea eta Recycl’arte.

“Urruñan bizi” herri aldizkaria.

Jadanik banatzen ari dira neguko aldizkaria. Barruan badira biziki artikulu interesgarriak. Adibidez: “Auzapez jaunaren agurra”, “Urruña, trantsizio ekologikoaren erronkaren aurrean”, “Logotipo berria”, “Herria-Oleta bidea”, “Kafarteneko lanak”, “Perspektiba berriak euskararentzat”, “Bizilekuak hobetzeko laguntzak”, “Herri barnearen antolaketa eta garapena: antolaketa hitzartuko eremu baten sortzea eta lur erosteak”, “Elkarteen berriak”, “Pilota txapeldunak”… eta abar. Hau da herri aldizkari honen 71. zenbakia.

Hondakin geldoen gunea

Laster hasiko dira erabiltzen, Bil ta Garbi sindikatuak Teilatu-Baitan prestatu duen hondakin geldoen metatze eta balioztatzerako gune berezia. Osora 8,4 hektarea hartzen ditu bere baitan eta 72.000 tona urteko tratatzeko ahalmena du, 40.000 metro kubiko hondakin urtero. Hilabetean, egun batez, hondakinak xehatuko dituzte eta gune honek hamar urteko iraupena ukanen du. Hondakin geldoen metatzeak ez du isuri kaltegarririk eragiten. Euriak bustitzen dituen hondakinak, lanjerik gabeko hondakin bizigabeak dira. Isuri lanjerosik ez da izanen. Euri urak bilduko dira eremu osoan eta urmaeletan emanak izanen dira. Usainik ere ez da izanen.

Pausuko bigarren merkatua

Hilaren 26an, igandearekin (8:00-14:00), izanen da aurtengo bigarren merkatua, Pausu auzoan, zubi aitzineko plazatxo berrian.

Mus txapelketa pilota-plazan

Hilaren 19an, pilota-plazan, mus txapelketa izanen da (14:00), 20 euro bikote bakoitzeko. Lehen saria 200 euro eta bigarrena 100 euro. Izena emateko: 07-60-06-07-63.

Pilota partiden emaitzak

Iparraldeko Pilota Batzordearen amateur mailako buruz-buruko txapelketan, urruñarrek honako emaitzak ukan dituzte: Zigarroa (Urruñarrak) 40 – Maitia (Noizbait) 33.

Adindunendako ekitaldiak

Hilaren 9an, ostegunarekin, Goxo-goxoa dute saloina (15:45). Mahai jokoak (14:30). Hilaren 12an, igandearekin, Sopa Dance (salda dantza) herriko plazan, salda eskainiko da musika giroan. Hilaren 13an, astelehenarekin, euskal ihauteriari buruzko erakusketa eta azalpenak, Posta gelan (15:30). Hilaren 14an, asteartearekin, sukaldaritza saioa: azalorea gasnarekin (10:00). Loto ttikia (14:30). Hilaren 15ean, asteazkenarekin, landaketak Urruñako langileekin. Ondotik Mendi Ttikian bazkari partekatua. Abiatzea, Posta gelan (9:30). Karaokea (14:30). Izena emateko: 07-64-62-55-14 edo 05-59-47-95-08.