Haritz Barne zinegela

Zabalki elkarteak du herriko zinema gela kudeatzen. Urte guzian, arras molde erne eta jarraikian eskaintzen dio jendeari filma (frantsesez gehienak bainan euskaraz ere), eskoletako haurreri saio bereziak izan lehen maila, kolegio edo lizeo... EVAH enbalier helduen gunearekin ere harreman tinkoak ditu. Badira ere arratsalde bereziak haurrendako. Arteari dedikatu konferentziak eta zine eztabaidak biziari loturiko gai anitzen inguruan antolatzen dira ere. Zinegin festibala hor iragaiten da. Astean 10 eta 12 proiekzio artean bada. Gainera 2022. urtea berezia izan da, zinemaren 100. urtemuga ospatu baita.

Zenbakiak mintzo dira: jaz 11.148 sartze izan dira, 573 emanalditan. 252 film pasatu dira, eskolekin eginetaz kanpo.

Txaloak merezi dituzte musutruk lan egiten duten bolondres horiek, herriko kultura emaitzan handizki parte hartzen baitute.

Kontzertua

Larunbatean, Mendealan Azpeitia eta Hazparneren arteko lotura konfirmatzen duen gertakaria: Soinubila herriko musika eskola eta Azpeitiako Antxieta eskolako gazteak lehenik (18:00), omenaldiak (Jose Luis Francesena eta Kako Saint Esteben) eta bigarren partean Azpeitiako herriko orkestra. Goi mailako ikus-entzungarria urririk, deneri idekia. Kontzertuaren ondotik taloak eta edateko moldea izanen da, Peña Idiak elkarteari esker.