Heriotze

Talde batekin mendian zabilan 70 urteko emazte bat bihotzeko bulta txar baten biktima izan da aitzineko astearte arratsaldean, Oilandoi peko aldean, “Toki Lepo” inguruetan. Ez dute sokorritzaileek salbatu ahal ukan. Kostaldekoa zen.

Ukrainaren alde

Denek dakigun bezala, Ukrainako jendeak zinez laguntza beharretan dira eta hauen artatzeko gure Herriko Etxean erremedio bilketa bat antolatua da. Zuen emaitzak bulego tenoretan ekar ditzakezue.

Suhiltzaileak bolondres beharretan

Baigorriko kasernak suhiltzaile behar handia du. Kopurua mugatua du eta heldu diren urteetan erretreta hartzeak izanen direla ikusirik, heien zerbitzu eta ibilmoldeak ahulduko dira ez baldin badituzte partaide berriak atzemaiten. Gaiaren aipatzeko eta ofizioaren presentatzeko, informazio bilkura eginen dute martxoaren 20an, astelehenez (19:30), kasernan berean. Beraz 18 eta 45 urte artean baldin baduzue eta jendeen laguntzeko motibatuak balin bazirezte, biltzar hortara ongi etorriak izanen zirezte.

Bihotzeko ostatuak

Garaziko Bihotzeko Ostatuak 201 kilo janari edo elikagai bildu ditu Baigorriko “Spar Oronos” saltegian. Emaile guziak eskertzen ditu.

“Alaba” filma

Izan da jende eta mugimendu elizako plazan, ibiakoitz arrats euritsuan. 80ko hamarkadan iragaiten den Josu Martinez-en “Alaba” filmaren zati garrantzitsu bat moldatu da: ikastolako haur kantaldi bat bere publikoarekin eta jandarmen agerraldia. Figurante gisa 70 bat jendek parte hartu dute.

Euskal Herriko mus xapelketa

7 probintzietako finalak joan den aste hondarrean jokatzen ziren eta Baxe Nafarroari doakionez, Aldude Alfaroenean egiten ziren. Baginituen 4 talde Baigorritik, bainan ez da bihirik ere sailkatu. Aurten baigorriar muslaririk ez beraz, martxoaren 25ean Bizkaiko Zorotzan jokatuko den Euskal Herriko xapelketaren final egunean.

Itxaro Borda

Baigorriko irakurketa taldeak Itxaro Borda idazlea gomitatzen du martxoaren 24an, ortziralea, “Euri zitalari esker” izeneko eleberriaren aurkezteko. Kasu: ez da Bixentan eginen bainan Ortzaizeko Menta liburu saltegian (19:00). Erran gabe doa hitzordu hau deneri idekia dela.

Xan Mousques

Baionan ari den Baigorriko errugbilari gaztea berriz deitua da Frantziako taldearekin Ingalaterraren kontrako zoin gehiagokaren prestatzeko, 18 urtez petikakoen mailan. Partida martxoaren 18 huntan jokatzekoa da, hango Esher-eko zelaian.