Han eta Hemen | 2024ko Abenduaren 05a
Turbolab: etorkizuneko hegazkinentzat plataforma teknologikoa
Urri bukaeran, Jean-René Etchegaray Euskal Elkargoko presidenteak, André Garreta Baionako Merkataritza eta Industria Ganbarako eta ESTIAko presidenteak, Sylvain Loumé Akirako zuzendariak, Sandrine Derville Eskualdeko Kontseiluko lehendakariordeak, Joëlle Gras Departamenduko suprefetak eta Jean-Jacques Lasserre Departamendu Kontseiluko presidenteak, Turbolab propultsio aeronautiko berritzailerako plataforma teknologikoa inauguratu dute.
Aeronautika sektoreko karbono inpaktuari erantzuna
Turbolab, "Euskal Herriko Industria Lurraldea" programaren baitan abiaturik, aeronautika sektorearen karbono inpaktuari erantzuteko proiektu eta enpresei laguntzeko pentsatua izan da. Jean-René Etchegarayk azpimarratu zuen bezala: "proiektu hau bihar ekintza publikoari eta eragile ekonomikoei babesa ematean irudikatu behar dugunaren adibide ezin hobea da: gure lurraldeko enpresa nagusi batekin partaidetza, Akira teknologia, ESTIA ingeniaritza eskola eta Euskal Elkargoarekin".
Turbolab teknologiaren lekualdaketarako tresna berria da, propultsio berritzaileen inguruan ekosistema baten sortzeko aukera ematen duena.
Partaidetza estrukturatua
Turbolab proiektuko partaide bakoitzak funtsezko osagai bat ematen du: Akirak proba eta neurketa ekipamenduak eskuragarri ematen ditu, baita bere "entsegu ibilgailuak" ere. ESTIAren "Compositadour" plataforma teknologikoak aeronautika sektoreko industria zerbitzuko laborategi eskaintza estrukturatzen du, aire-propultsioko sistema osoa entseatzeko eta karakterizatzeko. ESTIAk formakuntza moduluak garatzen ditu eta Euskal Elkargoak Baionako Technocité gunean aktibitate desberdin horiek errezibitzeko eraikin bat eraiki du. Turbolab aterpetzen duen eraikina egokitzapen baldintzak betetzeko eta klima aldaketaren efektuak arintzeko pentsatua izan da.
Diruztatzea
Turbolab proiekturako inbertsioaren buxeta 6.450.000 eurokoa da, horietan Euskal Elkargoak 2.400.000 euro, Akirak 1.625.000 euro, Estatuak/ANR Frantziak 2030 950.000 euro, Estatuak/DGACk 600.000 euro, Estatuak/France relancek 75.000 euro, Akitania Berriak 600.000 euro eta ESTIAk 200.000 euro.
Bestalde, jakin behar da Euskal Elkargoko osoko bilkurako hautetsiek 310.000 euroko diru laguntza bozkatu dutela ESTIA ingeniaritza eskolarentzat, Turbolabeko funtsezko eragilea den "Compositadour" plataforma teknologikoaren hedapenerako.
