EUSKARAREN EGUNA. Joan den astean aipatu bezala, berez abenduaren 3an bada ere ENE Euskararen Nazioarteko Eguna, Diasporan ospatuenetarikoa den besta edo aldarrikatze egun hau, data horren aitzineko eta ondoko egunetan ospatu dute/ospatzen ari dira munduan barrena euskal etxe eta komunitateetan. Montevideon, Jon Sarasua lagun online egin zuten azaroaren 28an, Bruselan xarmanki atera zen bertso saioa Iker Letamendia eta Naia Arrizabalagarekin. Berlinen, 6an eta 10ean ospatuko dute Dylan Inglis gazte britainiar euskalduna solaskide. Londresen 7an eginen du Euskal Etxeak bazkari eta elgarretaratzea familiekin, Olentzero ere gomitaturik. Madrilen, Xabier Amurizarekin, bertsogintzaz mintzo, Txileko Santiagon bi deialdi, bertsoak, pintxo lehiaketa, euskara mikro tailerra, mintzodromoa eta pilotarekin. Argentinak hameka hitzordu antolatu ditu euskara hitzorduak, besteak beste Tres Arroyos, La Plata, Mendoza, Cordoba, Mar del Plata, José C. Paz, Cañuelas, Magdalena, Chacabuco, Pergamino, Buenos Aires-en... Aupa munduko euskaltzaleak!

GAZTEMUNDU. Iragan igandean helduak dira Euskal Herrira Eusko Jaurlaritzak euskal etxeetako gazteendako urte guziz antolatzen duen programa huntako aurtengo partaideak. Oroit aurten dantza tradizionala ari direla lantzen, abenduaren 1etik 15era. Hondarrean, 15 partaideetarik 13 Argentinakoak dira, bat Estatu Batuetakoa eta beste bat Uruguaikoa; 11 neska eta 4 mutiko. Euskal Dantzarien Elkartea lankide, dantza klaseak hartuko dituzte Gasteiz, Errenteria, Bilbo, Tafalla eta Lizarran; eta Euskal Herriko hainbat bazter bisitatuko, tartean Miarritze eta Donibane Lohizune, Baiona eta Baxenabarrea.

GUADALAJARA. Inoiz baino handiagoa da aurten Mexikoko Guadalajarako Liburuaren Nazioarteko Azokara (azaroaren 30etik abenduaren 4ra) bertaratu den euskal ordezkaritza. Idazleen artean, Arantxa Urretabizkaia, Bernardo Atxaga, Karmele Jaio, Kirmen Uribe eta Katixa Agirre; Ruper Ordorika eta bere bost musikariak; gaztelaniaz idazten duten Euskal Herrikoak, bederen Dolores Redondo (Baztango trilogia) eta Fernando Aramburu (Patria); ilustratzaileak Araiz Mesanza, Higinia Garay, Elena Odriozola, Maite Caballero eta Yolanda Mosquera; Etxepare Euskal Institutuko Irene Larraza zuzendaria... Latinoamerikako azoka garrantzitsuena da.