Hegoaldean | 2024ko Irailaren 26a
Otsoak Bizkaian
A.E.
Eusko Jaurlaritzak proiektua argitaratu du eta hilabeteko epea abiatu du ohar ala galderak eskuratzeko. EHNE eta ENBA laborarien sindikatuek elkarrekin publikatu ohar baten bidez salatu dute Jaurlaritzak otsoa lurralde osora zabaltzeko sustatzen duen plana, mendiko abeltzaintza baztertuz. Bi laborantzako sindikatuentzat otsoa inposatua da. Eusko Jaurlaritzari leporatu diote planean sakoneko arazoari ez heldu izana, bai eta laborantza sektoreari egituratzeko laguntzak ezartzeari uko egitea. Uste dute planaren helburuek arriskuan jarriko dituela abeltzaintzaren sektore osoa, behien, behorren, ardien eta ahuntzen artaldeak, bai eta mendiko larreen bizia. Planaren alderdirik larrienetakoa otsoaren populazioa handitzeko eta hedatzen laguntzeko asmoa da, abere horien mugimenduak ahalbidetuz eta espeziearentzat egokiak diren fauna pasabideak jarriz gauzatu nahi da.
Plana osatzeko baliatu duten diagnostikoan adierazia izan da otsoaren erasoek ustiategi gutiri eragiten dietela, Arabako eta Bizkaiko %5 guti gorabehera (301 ustiategiri). EHNE eta ENBArentzat kalkulua egiteko herrialde horietako ustiategi guziak aintzat hartzea deigarria eta bidegabea da, erasoak eskualde jakinetan gertatzen direlako.
Planean aurreikusi da abeltzainak laguntzeko taldeak sortzea, bai profesionalak, bai eta boluntarioak. EHNEk eta ENBAk aldarrikatu dute lehen sektore profesionala izanez, egituratzeko neurri serioak behar direla, ez duela boluntarioen esku gelditu behar. Otsoak kabala tropetatik urrun egoteko zakurrez baliatzea ere ez zaie egokia iruditzen, uste baitute arazo iturri dela konponbide baino gehiago.
