Amalia elkartea (Association pour la Mixité et l’Animation Locale et Intergénérationnelle en Amikuze), Donapaleun kokatua den bizitza sozialeko gunea da, Amikuzeko biztanleei beren proiektuak adierazi, diseinatu eta egiteko aukera ematen diena. Gehiago jakiteko, Laure Claverie elkarteko kidearekin elkartu gira.

Elkartasun sarea

2020an elkartea sortzeko gogoetak eramaten hasi ziren lurraldeko hainbat biztanle, 2021ean proiektua gauzatu ahal izan arte Ondotik, elkarteak bizitza sozialaren onarpena ukan zuen.

Hasierako helburua harreman sozialak sortzea zen, biztanleen arteko elkarlaguntzari indarra emanez. Amaliak publiko zabalarekin lan egiten du, denei idekia da.

Gaur egun, elkarteak gutti gorabehera 200 bat kide zenbatzen ditu eta 30 bat bolondres.

Lantalde desberdinez gain, kafe kalakaria (café papote) sortu du elkarteak, hilabetean ostegun goiz batez iragaiten dena, nun jendea biltzen den elkarrekin trukatzeko kafea edanez. Hilabetean behin, Donapaleutik aski baztertua den Oragarre herrian sortze tailerrak antolatzen dira, justuki mugitzeko zailtasunak dituzten hango adinekoentzat. Donapaleuko Céline Mirailh artistak ditu tailerrak animatzen.

Bestalde, elkarteak partaidetza ugari ditu, besteak beste Amikuzeko Burasotasun Sarearekin, RPE Goxamarekin (Relais Petite Enfance) eta Donapaleuko GEM (Groupes d’Entraide Mutuelles)-ekin.

Diruztatzeari dagokionez, CAF eta Departamenduarengandik diru laguntzak eskuratzen ditu eta proiektu deialdietan parte hartzen du.

Lantalde desberdinak

Elkartearen baitan lantalde desberdinak badira, bolondresek osatzen dituztenak.

Lehena burasotasun lantaldea da, haur eta buraso edota aitatxi-amatxien arteko ekintzak pentsatzen eta antolatzen dituenak.

Ondotik elkarlaguntzaren lantaldea bada, zointan emazte jostun bolondresek parte hartzen duten, astearte arratsaldero. Eskuz egiten dituztenak elkartasun proiektuentzat dira. Adibidez, bihotz formazko bururdiak egin dituzte bularreko minbizia duten emazteentzat baita buruko eta lepokoak Ukrainara bidaltzeko.

Jokoen lantaldeari dagokionez, ostiral arratsaldero biltzen dira bolondres eta parte hartzaileak elkarrekin jostatzeko, besteak beste musean eta xakean. Denei idekia bada ere, elkarteko kideak zioen gehien bat adinekoek parte hartzen zutela. Hori dela eta, Donapaleuko eskola publikoarekin partaidetza badu Amaliak, eta haurrak adinekoekin mahain jokoetan jostatzera heldu dira.

Ingurumena lantaldea ere bada, elkarteak duen baratzeaz arduratzen dena.

Informazio baliagarriak

Ingurumena lantaldean sustut bolondresak xerkatzen dira.

Familientzat, urteko kidetzak 15 euro kosta du, aktibitate guzietan parte hartzea ahalbidetzen du. Pertsona bakar batentzat berriz, 10 euro kosta du. HelloAsso webgunearen bidez kidetu daiteke, edota diru emaitza egin.

Antolatu gertakarien berri ukan daiteke besteak beste Donapaleuko egunkarian, Amikuzeko Irratian, STAR FM irratian, sare sozialetan edota argizko taulan.

Hurrengo hitzorduei dagokienez, kafe kalakaria maiatzaren 15ean iraganen da (10:00-12:00) Amaliaren egoitzan eta maiatzaren 16an familien eguna antolatuko da (16:30) Touzaa etxean, denei idekia.

Elkartearekin harremanetan sar daiteke 07-86-48-58-54 zenbakia edo assoamalia@gmail.com mailaren bidez.