Euskaraldia

Lehen hiru edizioak azaroz egin ziren, aurtengoa maiatzean izanen dugu, 15etik 25era. Engoitik dakizue, Euskal Herri guziko euskaldunak eta euskaldun izan nahi dutenak gomit direla 11 egunez euskaraz mintzatzera usaian baino gehiago, berdin usaiarik ez den jendearekin edo tokietan. Bi rola badira hortarako eta papoan ezartzen den txapa batez ezagun da: "Ahobizi", mintzatzeko prest direnentzat, eta "Beharriprest" berriz, euskaraz mintza zaien onartzen dutenak, ulertzeko bederen gai direlako.

Euskal Herri mailan, euskaldunak %30 bat girela uste da, eta Baxenabarre-Xiberoako eremu zabalean %50. Horien guzien aktibatzea da helburua, ezen baliatzen ez den hizkuntza galtzen baita, eta baliatzen dena aldiz bizitzen, transmititzen, aberasten, zabaltzen...

Parte hartu nahi duzu? Eman izena Internetez www.euskaraldia.eus gunean.

Amikuzen hitzordu garrantzitsua emana da maiatzaren 16an ostiralez, txapa horien banatze karietara. Besta giroan, Donapaleuko itzulia eginen dugu, dantzari, bertsolari, kantari, musikariek lagundurik (18:30). Euskararen alde mezu batzu plazaratuak izanen dira. Ondotik, gaualdi alaitsua proposatuko da merkatu estalian. Jateko eta edatekoak izanen dira. Dantzan eta kantuz artzeko parada izanen da berant arte nahi dutenendako.

Baxe Nafarroako erakustoki lagunen elkartea itzulgune batean

Berrikitan Baxe Nafarroako erakustokiko lagunen elkarteak bere urteko biltzar nagusia egin du.Urteko harat hunatetan, erakustokiaren lekuz aldatzea izan da gai garrantzitsua. Orain arte erakustokiaren kudeantza Lagunen elkarteak segurtatzen bazuen, oraindik aitzina herriak beregain hartzen du. Herriko Etxeak proiektu berria landu du Baionako Euskal Museoaren partaidetzarekin eta lekuko jende aditu batzuen laguntzarekin (Lagunen elkartea, Zabalik, historialari). Proiektu berria bizpalau gaien inguruan antolatua (Nafarroako erresuma, etxea, Jondoni Jakobeko bidea, besteak beste) eta Bideaken plantatua da.

Lagunen elkarteak segitu nahi du azken urte hauetan antolatzen duen udako hitzaldiekin. Uda huntako, ziklo berri bat preparatzen ari da eta gomita zabaldu du pertsona haueri: Mikel Erramouspe(Perkain dokumentalaz mintzatzeko), Ghislaine Rozenfarb (Bidaxune eta Peyrehoradeko judoen komunitateak), Jon Etcheverry (Lauburu), Beñat Zintzo Garmendia (sorginkeria Lapurdin), Jean Louis Montane (munduko bigarren gerlari buruz) eta Stéphane Larroche (eskualdeko mubleak).“Otto Krome" ikusgarriarekin bururatuko da aurtengo zikloa.

Trikiti'Trip zine-kontzertua

Patrick Larraldek, dokumentala egin du Europa ekialdean egin bidaiaz berri emaiteko. Trikia bizkarrean hartuta, Europa ekialderako bidea hartu du bertako musikariekin elkartzeko. Geldialdi bakoitzak, ekialdeko eta Euskal Herriko soinuen arteko oihartzunak agerrarazten ditu.

Dokumentala ostiral huntan erakutsia izanen da Donapaleuko zinegelan (20:30).

Ondotik, Flying Nomads taldekoak (Bulgaria) hor izanen dira gaualdia musikaz bururatzeko.

Sartzea 10€.