Heriotze

Jeanine Semerena (sortzez Zaldua) 84 urtetan zendu da eritasunez. Joan den ibiakoitzean ziren ehorzketak. Oronoziakaldeko Marroan bizi zen. Dolumin bizienak penetan diren Jacky alargunari, Marie France, Jean Michel, Sylvie seme-alaberi eta familia guziari.

Sortzez baigorriarra zen Marcelle Mutuberria (Olivieri sortua) joan den ortziralean ehortzi dute gure herrian. Luzaz jasan behar ukan duen eritasunak ereman du 64 urteetan. Miarritzen bizi, Daniel Mutuberria pilotari zenaren alarguntsa zen. Doluminak familiari.

Istripu

Joan den astean Itsusiko harrietan eroriko baten ondorioz hil den 81 urteko emazte mendizalea Baionan bizi zen bainan baigorriarra zen sortzez: Raymonde Darcant (Errecart sortua) Bastida Olakoa. Doluminak familiari eta nahigabea gertatu delarik, harekin ziren laguneri.

Joalduna

Joan den astean aipatzen ginuen IK talde armatuko gudari hilen oroimenezko margolana, Leizparzen estreinatua. Omenaldiari loturik, gertakari bitxia iragan da: ondoan plantatuak ziren joaldunetarik bat desagertu da igande gauan. Norbaitek edo norbaitzuk heiekin ereman edo ondoan den errekara bota ote dute? Urak gora ziren gainera aste hondar hartan. Zerbait dakienak Lagundu elkarteko kide bat abisa dezala!

Herri Urrats Baigorritik

Senpereko egunaldi handira joaiteko autobusa gure kirol zelaiaren aparkalekutik abiatuko da (8:00). Txartelak (10 euro) Spar Oronos saltegian eskuratzen ahal dira.

Baigorri Tafalla pilotan

Zaharrer Segi elkarteko 25 bat pilotari Baigorrirekin parezkatua den nafartar herrira joan dira, tafallarrek gomitaturik, trukaketa egun baten partekatzeko. Joko garbi erakusketa egin dute Iban Riouspeyrous, Paskal Dutey, Benoit Semerena eta Laurent Albistur-ek eta esku-huskako desafioa antolatu da ondotik. Trinketekoen eta ezkerparetakoen arteko pilota misto bereziak erabili dituzte. Anekdotarentzat, jakin hemengo Andoni Larre eta David Barreneche hangoeri nagusitu direla 22/14. Besta giro goxo eta adiskidetasunean iragan da egun guzia.

Artzainen lasterkaldia

Maiatzaren 11n iraganen da igandez Oilarandoien gaindi. 23,6km, 1.350 metroko desmailarekin, 400 bat lasterkariek emana dute izena. Abiatzea herriko plazatik (9:30). Hori baino lehen, 15 kilometroko ibilaldia (7:00) hasiko da 200 parte-hartzaileekin. Ondotik, Baigorriko Petrikorena eta Ortzaizeko Goikoetxea enpresek laguntzen duten zozketa eginen da Orthezeko "Lilou Bel'ange" elkartearen alde. 10 urteko neskatxa da Lilou, buruz eta gorputzez ezindua,"Angelman" izeneko sindrome arraroarengatik.

Latino dantza

Cumbia, Salsa, Bachata, Reggaeton, Samba, dantza latino ikastaldiak eginen dira Plaza Xokon ortzegunero, heldu den maiatzaren 15etik goiti, ortzegunez (19:00-20:00). Izen emaiteak zenbaki huntan egiten dira: 07-52-45-90-31.