Kantu afari

Otxaldetarrak elkarteak antolatzen du kantu afaria, ekainaren 7an, larunbat arratsez (19:00), Barberaenean. Jaz Noblianean iragan zen, arrakasta pollitarekin. Mahain on baten inguruan elkarrekin kantuz suharki aritzea, zinez atsegina da. Menua 30 euro gostako da, arnoa barne. Izenak eman behar dira Erramun Intzaurgarati (06-38-52-65-44), ekainaren 1a aitzin. Herritar guzieri idekia da, eman izena eta etorri goxoan.

Mendiko istripu

Istripu deitoragarria iragan da maiatzaren 1ean mendian. Goizeko 9tan abiaturik, Baionako mendizale talde batek egina zuen Mehatzeko leporainoko igaitea, menturaz Artzamendiko kaskoraino ere joanik. Gibeleratekoan gertatu da ezbeharra arratsalde erditsutan. 80 urteko emazte batek erorikoa egin du Zarkanbideko gainetatik, arroketan behera, ehun bat metrokoa batzuen arabera. Sokorriak deituak izan dira, helikopteroa barne, baina emazte dohakabea han berean gorputz altxatua izan da. Lagunak txoke egoeran ziren eta horietarik bi ere jautsiak izan dira helikopteroz.