Uztailaren 1ean, Maider Arosteguyk Euskal Elkargoan saneamendua eta euri-uren ardura duen lehendakariordeak eta Emmanuel Alzurik edateko uraren, itsasbazterraren, kosta-lerroaren, GEMAPI (ur-inguruneen kudeaketa eta uholdeen prebentzioa) eta ingurune naturalen ardura duen kontseilari ordezkariak bainatzeko uren kalitatea bermatzeko ezarri den dispositiboa aurkeztu dute, kostaldeko auzapezak hor zirela.

Urtero, Euskal Elkargoak sareak modernizatzeko eta kutsaduraren kontra borrokatzeko 40 milioi euro inbestitzen ditu.

Eguneroko kontrola

Udan, Ipar Euskal Herriko hondartzetan egunero 20.000 pertsona bainatzen direla eta, bainatzeko uraren kalitatea ezinbesteko erronka da. Horretarako, goizero uraren kalitatearen kontrola egiten da, hainbat adierazle kontuan hartuz: eguraldi eta ozeano baldintzak (prezipitazioak, haizea, uhaina eta abar), ur-saneamendu sistemek duten funtzionamenduaren egoera eta Escherichia coli eta hesteetako enterokokoen (Entérocoque) azterketa bakteriologiko zaluak. Azken horiek, 3 ordutan informazioa ematea ahalbidetzen dute, bainatze guneen zaintza ideki aitzin. Guzi horrek egunero aurreikuspena egitea ahalbidetzen du.

Kalilo aplikazioa

Aplikazio bat plantan eman da informazioa zabaltzeko. Izan ere, herritarrak Kalilo aplikazioaren bidez informatzen dira, lau hizkuntzatan eskuragarri dena eta jadaneko 47.000 erabiltzaile baino gehiago dituena.

Hondartza hesten bada, Kalilo aplikazioa eguneratzen da, eta debekua berehala jartzen da indarrean Herriko Etxearen agindua argitaratzen denean, horren berri emanez bandera gorri eta ubel baten bidez.

Iazko sasoiaren bilana

2024ko denboraldia bereziki euritsua izan da, maiatzetik irailera 40 eguneko euriteak izan baitira. Egoeraren hobekuntza 2013. urtearekin konparatuz antzeman daiteke, urte hartan ere antzeko prezipitazio-mailak izan baitziren. Egindako lanari esker, bainatzeko uren kalitatea hobetu da, eta 2024an hiru aldiz gutiago izan dira hondartzak hesteko gomendioak 2013. urteari konparatuz.

Iaz, orotara 3.100 analisi egin dira denboraldian zehar, hondartzak %92,3an idekiak egon dira, eta batez beste 10,7 eguneko hestea ukan du hondartza bakoitzak.

Bestalde, lau milioi euroko ikerketa eta azterlanak egiten ari dira, 2026rako 13 herritako tratamendu-ahalmena modernizatzeko.