Heriotze

Denak harriturik gelditu gira, Jean-Pier Estekaren heriotzaren berria jakitean joan den astearte goizean, nahiz eta haren lagunek, etxekoek eta auzoek bazakiten eritasunarekin borrokan ari zela azken denbora hauetan. 63 urte zituen, 64 urte ekainean egin beharrak. Bi aldiz operaturik bizkarretik, gero lotu zitzaion hainbat desmasi egiten duen eritasun latza. J-Pier Esteka laboraria zen ofizioz, baina betidanik laket izan zaio ondoan lan egitea, laborantzatik ez urrun haatik, hala nola Belok-eko fraideen komentuko gasnategian, gero esne biltzen, kabala karreatzen abereen hiltegira. SEGI CUMAren buru ere izan da 22 urtez, 1988tik 2010 arte, lehendakari, kudeatzaile eta langile edo xofur gisa tresna handiak ibilaraziz, sasoinean uztamakinarekin (moissonneuse batteuse) ikusten zen laborari etxeetan. Lan guzien artetik, herriko baskula ere martxarazi zuen, abereen pisatzeko, hainbat urtez. Jendekina zen J-Pier, lagunkina eta zerbitzu egile handia. Erretreta harturik, biziki kontent zen etxaldearen segida familiako batek, Julien bere ilobak harturik.

Jende oste gaitza bildu da J-Pier Estekari, azken agur baten egiteko, joan den ortzirale goizean, Aiherrako elizan. Dolumin bizienak hain ongi J-Pier artatu duen Hortense bizi lagunari, Marie Hélène eta Gracie arreberi, Jean-Louis anaiari, hauen familiakoeri eta jendakia guziari.

Euskaraldia maiatzaren 15etik maiatzaren 25era

Euskaraldia kanpaina bi urteetarik Euskal Herri guzian egiten da. Honen helburua da euskara dakitenek euskaraz mintzatzea egun guzietako harremanetan eta euskara konprenitzen dutenek prest jartzea euskara entzuteko. Aiherran Beltzuntze elkarteak du kanpaina hau akuilatzen. Parte hartzeko izena eman behar da Euskaraldia sarera sartuz (Belarriprest eta ahobizi 2025 orrialde nagusia|Euskaraldia).

Horrek erran nahi du batzuk "Ahobizi"-ren rola hartuz hamabost egunez euskaraz mintzatzeko engaiamendua hartzen dutela, eta beste batzuk "belarriprest"izanez, euskaraz entzuteko edo behatzeko prest direla denbora berean. Bakoitzak papoan ezartzeko txapa ukanen du eta txapa horiek Beltzuntze elkartekoek izena emana dutenei banatuko dizkie.

Kanpaina hunen kari, herrian kantaldi ederra proposatua zauku, Gurashow taldearekin, maiatzaren 16an (17:30) Denen Etxeko gela handian. Duela 3 urte Pontx pailazoarekin egin zen bezala, kantaldi hau eskolatik landa antolatua da, eskoletako haurrak errazki jiteko gisan, izan diten ikastoletakoak, eskola publikoetakoak ala pribatuetakoak. Baina jende helduak ere etortzen ahalko dira, dudarik gabe.

Kantaldia Gurashow taldearekin

Beltzuntze elkarteak, publikoa gomitatzen du maiatzaren 16an, ortziralarekin (17:30), Denen Etxeko gela handira, emozio eta bizikidetasunean aberatsa den musika bidaiarendako. Tenoreari dagokionez, ez da dudarik nahitara goizik hasiko dela kantaldia (17:30), ikasleak eskolatik landa berehala jiteko gisan.

Oroitarazten dugu kantaldia Euskaraldiaren kari antolatua dela, eta urririk eskainia, euskara mintzatzen edo konprenitzen duten guzieri zuzendua, hots publiko zabalari. Talde huntako kantariak ezagunak dira Kattalin Indaburu, Amaia Riospeyrous, Maguy Mirande, Maider Cigaroa eta Philippe Albor. Arrazoi bat gehiago kantaldia ez hutsegiteko!