MACACHIN. Loriatu dira, joan den asteburuan bururatu den Munduko Mus Txapelketan parte hartu duten guziek, bertakoek, Macachingo Euzko Alkartasuna euskal etxekoek, prestatu dieten programa, harrera eta ahaidetasun moldeekin. Edo, bazekiten, beti honela baita Argentinako La Pampan antolatzen den euskal ekitaldi oro, baina beti da bozkario eta sentimendu atsegina ikustea Euskal Herritik 10.000 kilometrotik goiti, zinez etxean bezala, euskaltasuna lagun errezibitua izatea eta astebetez errege-erregina gisa okupatzea zutaz, oraingoan musa lokarri. Txapelduna, Peruko bikotea izan zen, Bittor Lopez eta Juanjo Meneses; bigarren Argentinako A taldea, Mariano Iribarne eta Edgardo Ratto; eta hirugarren, Mexikoko Iñaki Fernandez eta Luciano Fernandez. Ondotik, Argentina C, Argentina B, Nafarroa, Euskadi, Frantzia, AEB, Txile, Venezuela, Kanada eta Uruguai. Heldu den urtean Euskal Herrian egingo da Munduko Txapelketa, Bilbon seguruenik, behin-behineko datak urriaren 10etik 18ra. Zorionak muslari eta lagun guziei!

AUSTRALIA. Arrakastaz ibili da Australiako Queensland estatu iparraldeko euskal emigrazio-gune historikoetan "Basques in Asutralia" erakusketa. Oroitu Euskal Herrian hasi zuela bere ibilbidea erakusketa ibiltari honek, eta hondarrean heldu dela bere leku naturala zuen Australiara. Agorrilaren 17tik, Townsville, Ingham eta Ayr hirietatik pasatu da, beti Euskal Australiar Alkartea, Eusko Jaurlaritza eta tokian tokiko euskal etxea lagun, kasu huntan Townsvillen egoitza duen "North Queenland Basque Association" lankide. Hemen ere loriatu dira, heien istorioak eta historia baitzen erakusketako 10 euskarrietan agertzen zena, argazki bilduma ederra barne. Estreinatzeetan, agurra dantzatu duen bertako Maite Kelly dantzaria ere ukan dute. Bizkitartean, Euskal Herrian ere badabil erakusketa beraren beste kopia bat, Bilbon momentu huntan. Eta, heldu den urtean seguruenik, ikusiko, erakusketa Sydneyra ere heldu da, hiriko Gure Txoko Euskal Etxearen eskutik.

ETA GEHIAGO... Laburbilduko ditugu gure Diasporako beste ekitaldi batzuk. Konparazio, heldu den larunbatean, euskal dantza ikastaroa eginen du Bruselako Euskal Etxeak bere egoitzan; egun berean bere 21. urteroko Besta, Rocklin Kaliforniako Iparreko Ibarra Euskal Etxeak, Lincoln-en; igandean, San Frantziskon, Euskal Musika Klasikoaren Eguna Presidioko Antzokian, BEO euskal erakundea antolatzaile (bai, ongi irakurtu duzu!); astelehenean, Renon, BEO ere tarteko, piano eta txistu kontzertua, Josu Okiñena pianista eta Gari Mendizabal txistulariekin, UNR unibertsitateko Euskal Ikasketa Zentroaren eskutik; egun berean Buenos Airesen, Eusketxeren euskal mitologia tailerra online; ostegunean, Bizkarsoro filma emanen dute Bruselako Euskal Etxean, Montevideon, Euskaro Euskal Etxean, minbizia eta osagarria hizpide, eta Okzitaniako Tolosan Kantuz ate-irekitze eguna, Denak Bat euskal etxea antolatzaile. Aitzina eta goiti, munduko euskaldunak!