Heriotze

Sortzez irisartarra, aspaldian Baigorrin ezkondua eta familiatua zen Lucie Sagardia (sortzez Etchemendy) supituki hil da 74 urtetan, bere etxean. Doluminak Roger senarrari, Pascal eta Laurence seme-alaberi eta familia guziari.

Lucie zena Irisarriko familiaren hilobian ehortzi dute.

Euskal Trail, Artzainen lasterkaldia, Lokala eta beste... Gure herriko elkarte, aktibitate edo animazio desberdin frangotan engaiatua, huts handia utziko du.

Irabazleak

Irulegiko Irratiaren aldeko sustengu kanpainaren karietara antolatu zozketan, 4 sari irabazle ukan ditugu Baigorritik: XiItei Coscarat familia, Belexi Etxartea, Annie Juzan eta Marie Jo Etcheverry Manexene. Goresmenak!

Mus

Frantses federazioak antolatzen duen mus txapelketaren kondu, finalak Irisarrin jokatu dira Pazko astelehenez. Baigorriko ekipa (Paul Dupuy-Pantzo Hirigarai) multxoetan sailkatu da goizez, final hamaseirenak Aiherraren kontra irabazi bainan arratsaldez, final zortzirenetan galdu dute Altzai-en kontra (2/3). Iduriz, heien ahal guziak bazkarian utzi dituzte.

Pilota

Buruz-burukako finalak Zuraideko Xilar trinketean jokatu dira joan den igandean. Baginituen bi jokolari gure elkartetik, bat galtzaile, bestea txapeldun.

Artekoetan: Eneko Eyherart (Zaharrer Segi) 28/40 Lucas Bidart (Uhaldean).

Helduetan: Andoni Larre (Zaharrer Segi) 40/32 Asier Aspuru (Endaiarrak).

Goresmenak Belarreko semeari!

Baigorriko kulturaldia

Apirilaren 10ean, ortziralez (19:30), Urdozeko kaperan, Xabier Itzaina ikerlariak eta Xabi Etxeberri soinulariak “Ttunttuneroen gizartea” izeneko liburua presentatuko daukute, Ipar Euskal Herriko herri soinuaren aurkezpen musikatua eskainiz.

Apirilaren 12a: (igandea), “Nor naizen baneki” antzerkia Plaza Xokon (18:00). Ikuslea inkisizioan, Frantziako iraultzan, karlistadetan eta 36ko gerla zibilean barna ibiliko da, familia, jabetza, mugak eta indarkeria koloniala bezalako gaiak jorratuz. Pertsonaiak ere barne bilaketa batean sartuko dira, gauzatu beharreko erabaki eta beren kontra-erranen artean kokaturik.

Idazleak: Harkaitz Cano, Ximun Fuchs, zuzendaria:Ximun Fuchs, aktoreak: Ramon Agirre, Garoa Bugallo, Maialen Diaz, Aline Etxeberri, Manex Fuchs, Idoia Tapia, Oier Zuniga.

Txartelak salgai Basaizea elkartearen webgunean eta Spar Oronos saltegian.