Kantaldia

Apirilaren 19an (17:00), Ezpeletako elizan kontzertua eskainiko dute Baionako Polifoniak eta Gozatuz taldeek. Lehenak bigarrenaren gonbidapena onartu du, eta bi abesbatzak elkarlanean ariko dira oholtza gainean.

2018an sortua, Baionako Polifoniak gizonezko hamar kantariz osaturiko taldea da, zuzendaririk eta partiziorik gabe aritzen dena, entzutean eta elkarrekilako loturan oinarritua. Haien errepertorioak euskal kantutik zuluera, korsikera edo okzitaniera barne hartzen ditu.

Bestalde, Gozatuz taldea 32 emaztez osatua da, Jean-Paul Brustek zuzendua, JB gitarrarekin eta Pattik kajoiarekin lagundua. Gehienbat euskal kantuak eskaintzen dituzte, nahiz eta bestelako hizkuntzetako piezak ere lantzen dituzten.

Bi taldeek zortzi kantu abestuko dituzte bakoitzak, eta bukaeran bi pieza elkarrekin interpretatuko dituzte.

Sarrera 10 eurokoa izanen da (urririk 15 urtez petikoentzat). Elizako ateak ordu erdi lehenago zabalduko dira (16:30).

Eusko Eguna

Eusko Eguna apirilaren 18an ospatuko da herrian bertan. Egitarau aberatsa proposatua izanen da, merkatua, animazioak, jantzi salmenta, mintzaldia, elkarteen herrixka, haurrendako aktibitateak, musika, bazkaria, dantza, ikusgarria eta kontzertuekin. Sutagar, Baleko eta Zetkin taldeak hurbilduko dira. Kontzertuen aitzin salmenta 12 euro edo euskotan euskalmoneta.org webgunean.