Heriotze

Pierrot Durruty joan den astean zendu da 69 urtetan. Etxeparean sortua, 7 haurridetan zaharrena (premua), hor ereman du bizi osoa laborantzan, aitamek erosia zuten etxaldean segida harturik, bere aldian Stéphane semeari lekua utzi arte. Aiherra Harregiko Pierrette Intçabirekin ezkondua, 5 haur ukan dituzte: Christelle, Florence, Stéphane, Mathieu (99an istripuz hila) eta Maeva. Pierrot kirolaria zen gaztetan, errugbilaria izanik Hazparneko taldean euskal indar jokoetan arizan zen Donamartirirekin. Muslari errabiatua zen, konpainiako gizona, elgarretaratzeak laket zitzaizkion. Herriko hautetsi ere izana zen zenbait urtez. Ortzirale saindu arratsaldean eliza bete-betean iragan dira ehorzketak, Ttotte Saldubehere apezak kartsuki kudeatu duen elizkizun bereziarekin. Nahigabean uzten dituen Pierrette espos lagunari, haren haur eta haur ttipieri, berriki beste seme bat galdua duen Mailuxa ama xaharrari eta hunkiak diren guzieri bihotzetik doluminak.

Harpealde trinketean

Negu huntako pilota lehiaketa palantxaz apirilaren 11n bururatuko da larunbat arratsaldez. Karia hortarat herriko gazteek afaria antolatzen dute herriko gelan, xerriki azita, entrekosta lursagarrekin, xokolatezko bixkotxa, gasna, kafea ondokoarekin eta arnoa barne (28 eurotan). Izena emaiteko, ahal bezain laster eginez, ez da beharbada berantegi, 06-32-92-57-04 edo 07-60-36-75-49ra deituz.