Hilabeteetako eztabaida politiko eta teknikoaren ondotik, Édouard Geffray Hezkuntza Nazionaleko ministroa, maiatzaren 20an eskualdetako hizkuntza eta kultura ikerketa taldeak antolaturiko entzunaldi batean izan zen, Paul Molac eta Peio Dufau ko-lehendakariak direla. 50 parlamentarik izenpeturiko gutuna ere eman zitzaion ministroari, eskualdetako hizkuntzak, besteak beste euskara eta okzitaniarra irakasteko jartzen diren oztopo administratzaileak kentzea galdeginez.

Ipar Euskal Herriko lehen graduko ikasleen %45a euskaraz eskolatua delarik, iragarpen honek egiazko esperantza sortu zien Euskararen Erakunde Publikoari (EEP) eta Ipar Euskal Herriko parlamentariei.

Ministroak eskualdetako hizkuntzen irakaskuntzaren inguruko kuadro baten ildo nagusiak aurkeztu zituen.

Iragan entzunalditik gutira, Ouest France hedabidean Édouard Geffray ministroak egin elkarrizketa esklusiboan, lizeoetako ikasleek baxoko bi berezitasunetako baten azterketa haien ikasketa hizkuntzan egiteko aukera ukanen dutela iragarri zuen. Ber gisan, ahozko handiaren zati bat ere euskaraz egiten ahalko da.

Seaskak iragarpen hori baikorki hartu du, “urte luzeetako borrokaren fruitua” dela azpimarratuz. Hala ere, “zur eta lur” gelditu da, neurri berri hori 2028an baizik aplikatua izanen ez dela jakitean. Horrez gain, “Jakinik 2027an hauteskunde legegile eta presidentzialak izanen direla, iragarpen horrek ez du inolako sinesgarritasunik, 2028an Edouard Geffray ez baita gehiago ministro izanen” gehitu du. Estatuaren engaiamendu falta salatzeko, ekainaren 3an Etxepare lizeoko 150 ikasle inguruk ekintza sinbolikoa egin dute Baionako suprefetura aitzinean, baso erdi hutsak lurrean utziz.

Bestalde, ulertarazia izan da aurten leheneko matematikako froga euskaraz pasatzea erabaki duten ikasleen “ongizatea babestua” izanen dela, ez direla kaltetuak izanen eta euskaraz eginen diren matematikako azterketak zuzenduak izanen direla.

Seaskak ikasleak, familiak, parlamentariak, hautetsiak, irakasleak, langileak eta Herri Urratsera hurbildu ziren herritarrak eskertzen ditu, azken hilabetetan mobilizaturik.