Harpealde gunearen zaharberritze energetikoaren sailean, lanak uda huntan bururatuko dira, jadanik aipatuen gainera, erabilera anitzeko gela handiaren teilatuan iguzki instalazio fotovoltaikoaren ezartzearekin. Hunekin herriaren eraikin guzien behar energetikoaren parte handiena betetzea asmatua da. Harpealde gunean baditugu trinketa 1984an eraikia, huni datxikola geroxago altxatu ziren gela handia eta eskola publikoaren gelak eta jostalekua herriko eskolak, aisialdi zentroak eta herritarrek aldizka baliatzen dutena. Obrengatik gune hau hetsia izanen da uda huntan. Jostalekua haatik irekia egonen da herritarrentzat, hirixkarateko bidean den gelatik sartuz. Bainan uda huntako lan handienak herria zeharkatzen duen bide handian, Herriko Etxea eta elizaren artean beharrak dira, bereziki Harpealde trinketaren inguruen antolatzearekin.

Obra horiek, bazterren edertzeaz gain erabiltzaile guzieri, gune hortarateko sarbide seguragoa ahalbidetuko dute. Obren denboran, traba eta nekezia asko aitzinikusiak badira, ustegabeak ere gerta daitezke. Beroaren erdian arizan behar duten langileak gogoan ditugula, izan gaitezen jasankor.