Bestak ate joka

Asteburu huntan, Jondoni Petriren ospakizunek hartuko dute protagonismoa. Gazteen talde dinamikak betiko egitarau bikaina proposatzen digu. Ostegun 25a, (19:00) Besta Komitearen bestako gakoen eskuratzea, jarraian merkatarien gaualdia, pintxo-pote moduan ongi animaturik, (19:30) Zirikolatzeko dantzariak, (20:30) Artxeroak senpertar kantariak, (22:30) Xibalet elektrotxaranga. Ostiral 26a, (14:00) eskolen jokoak kirol zelaian, (18:00 eta 19:00) Open Gantxikiko 2 finalerdiak esku-huska, (20:00) zintzur bustitzea, (21:30) zikiroa Baga-Bigak animatua, etxeratzea taxiz urririk. Larunbat 27a, (14:00) beer-pong torneoa, (16:00) pilotari gazteen finala pilota plazan eta ordu berean pilota hutseko nesken finalak Gantxikin, (17:00) gazteluko lasterketaren hasiera, (19:00) lasterketako sarien banaketa, (19:30) Herriko Etxean kirolarien sarien ematea, (20:30) Ondoezik, (22:30) Ezpalak, gauerditan Katxi gaua bururaino. Igande 28a, (10:00) meza nagusia, (11:00) Open Gantxikiko finala, (12:00) aperitifa Herriko Etxeak eskainirik, (13:30) paella, (18:00) ahate jokoa, (19:00) Berçaitz Anaien kantaldia, (20:00) Oxtikda, (23:00) Bad Sound, (00:30) Koloka. Astelehen 29a, “asiat” mozorro eguna, (16:00) Komitearen desfilea, (18:00) mutxikoak Saltokan taldearekin, (20:00) Andoni Oilokiegi, (22:00) Diskobolo, bukatzeko DJ Komite. Herriko jatetxeek, besta denbora guzian, menu politak eskaintzen dituzte, hautatu, manatu eta hurbildu. Ongi gozatu.

Ostiral eta larunbatean dantza Larrekon

Ekainaren 26 eta 27an (20:30), bestetako burrunbatik ihes egin nahi dutenek, dantza ikuskizun paregabea aurkitzen ahalko dute Larreko salan, “L’envol de Minuit” balleta klasiko eta garaikidearekin. Liluratzeko emanaldia eskainia zauku, erritmo bizi batean, nun poesia, erromantizismoa eta birtuosotasuna elkartzen diren. Jennifer eta Dennis Cala Valdések idatzi, koreografiatu eta zuzendua. Ordu bat eta erdiren iraupena, prezioa 18€, 12 urtez petik 14€, erreserba: boutique.otpaysbasque.com gunean edo turismo bulegotan.

Antzerkiak, Scaramuccia elkartearekin

Amatur antzerkilarien lana eta engaiamendua ezagutaraztera gomitatzen gaituzte, uztailaren 1etik 5era, arrats guziz (20:30), igandean aldiz (18:00 eta 20:30), Larreko antzokian. Belaunaldi guzietakoek parte hartzen dute, 140 antzerkilarik urtean zehar ikasitako emaitza partekatzera taula gainera igoko dira, ber denboran Larreko sala antzerki transmisioaren eta sorkuntzaren gune bilakatzen da. Bi orduren iraupena, sartze librean, erreserba: https://www.theatre-scaramuccia.com/.

Besta Berriri begirada

Aro eguzkitsua lagun, biziki ongi joan da ohiko Besta Berri, jendalde ederraren parte hartzearekin. Ohartzekoa da zonbait gazte berri sartu direla “tropela” berezi hortan, ibilbidea ere ongi loratua eta etxetako leihoetatik zintzilik asko oihal xuri apainduak. Zeremonia hortan, kanta, dantza, musika, otoitzak elkarturik, fedearen lekua nabarituz.

Hazkurriaren banaketako boluntarioak

Senpereko Gurutze Gorria arduratzen denez hazkurriaren banatzeaz, bilatzen ditu boluntarioak, “aritzeko, egiteko eta partekatzeko, irri egiteko eta kalakan aritzeko, sostengatzeko eta laguntzeko”. Ostegunetan, egun osoan ahal da bihotz oneko eta elkartasuneko lan balios hortan parte hartu, izen ematea deituz: 06-11-79-61-52.

Ostegun huntan Auxtin Zamora mediatekan

Ekainaren 25ean (17:30), iragarria zen Xabier Elosegiren liburuaren aurkezpena, duela guti ezeztatua izanik, Auxtin Zamorak ordezkatuko du. Senpertar idazle eta olerkari ezagunak, “Mundu asko… Ortzana Batto” sortu duen bideoa erakutsiz, aintzira gaitzat hartuz, toki horretako toponimiaz eta leku desberdinen izenen bilakaeraz arituko da. Sartzea libre, solasaldia euskaraz, tragotxo bat eskainia da ondotik, bestetara joan aitzin.

Ihiztarien bazkaria

Ihiztarien elkarteak antolatzen du ohiko bazkaria beren ttattolan, uztailaren 5ean, igande eguerditan. Erreserba, mezuz: 06-18-05-87-29.