Ezkontza

Agorril hastapenean ezkondu dira Peio Urriza, sortzez Bixkarrenekoa, eta Patricia Mathieu, Herriko Etxean. Biak erretretan dira eta bikotea bizi da orain Artxinanean. Goresmenak!

Amuarrain besta

Buruilaren 20an ospatuko da ohiko besta hau. Mezatik hasiko da (10:30), ondotik pilota partida eta pottoka ibilaldiak. Gero aperitifa eta bazkari alaitua. Krema opilak nahi dituztenek manatu behar dituzte buruilaren 14a aitzin (06-25-31-81-62). Nork edo nork eman nahi lituzketen zozketako lotak eskuratuko dira buruilaren 19an, larunbat arratsaldez, Artetxea gelan. Posible izanen da ere janaria etxerat eramaitea aitzinetik deituz gorago den telefono zenbaki berdinera.

Harlangaitz idorra

Urriaren 3an eta 4an, larunbat-igandez (10:00-17:00), iraganen dira harlangaitz idorraren (pierre sèche) deskubritzeko egunak (Euskal Elkargoak bultzatzen duen Mendi Jakitateak proiektua). Goizean, GR10a segituz, inguruan eraikitako artzain ontasuneri emanen zaie behakoa (piknika beharko da ereman). Arratsaldean, harrizko murru baten eraikitzen ikastea, Bastien Blot ofizialearekin. Hamar lagun hartuko dira gehienik egun bakoitz, urririk, haatik izenak aitzinetik emanez (www.caue64.fr).

Dantza jauziak

Agorrilaren 30ean dantza jauziak antolatuak zituen Otxaldetarrak elkarteak eliza aitzineko plazan. 50 bat laguneko multxoa, kasik denak herritarrak, bildu da, aro ona lagun. Erramun Inçaurgaratek kudeatu du musika. Jendea loriatu da. Berritu beharko den hitzordua!