Herriz Herri - Donibane Lohizune (L) | 2026ko Irailaren 10a
Sartzea, Senixeko hondartzaren inguruko lanak eta ARTha, artea itsasbazterrean
Sartzea
Ikasturte berria abiatu da Donibane Lohizunen: 1.150 haur inguru itzuli dira hiriko ikastetxeetara, horietarik 690 sare publikoan eta 460 sare pribatuan. Herriko Etxeak 920.000 euroko aurrekontua bideratu du aurten lehen mailako eskolen funtzionamendura. Udan, gainera, hainbat lan egin dituzte eskola batzuetan, teilatuak, argiztatzea, aireztatzea eta berokuntza sistemak hobetzeko.
Senixeko hondartzaren inguruko lanak
Senixeko lanek ez dute hondartza bera aldatuko, haren gaineko aparkalekua eta sarbideak baizik. 2024ko neguan sarbideko bidearen zati bat erori zen, eta ikerketek erakutsi zuten euri ura itsaslabarrera isurtzeak lurra ahultzen zuela. Horregatik, egungo aparkalekua naturalizatuko dute eta euri urak itsaslabarrera heldu aitzin bildu eta bideratzeko sistema bat sortuko dute. Autoentzako aparkalekua itsasertzetik urrunago kokatuko da, lurzorua behin betiko artifizializatu gabe.
Hondartzara heltzeko oinezkoentzako bide paisaiatu bat ere eginen dute, zurezko behatoki eta atsedenlekuekin. Bizikletentzako aparkalekuak ere ezarriko dituzte. Lanak irailaren eta urriaren artean eginen dira, lehenik hondartzatik hurbilen den beheko aldean. Denbora horretan, Senixeko aparkalekua eta obren eremutik pasatzen den itsasbazterreko bidexkaren zatia hetsirik egonen dira.
ARTha, artea itsasbazterrean
ARTha erakusketaren 24. aldia irailaren 19an eta 20an iraganen da Jacques-Thibaud pasealekuan, (10:00-18:00). Bi egunez, itsasbazterreko pasealekua aire zabaleko erakustoki bilakatuko da, artistei beren obrak zuzenean publikoari aurkezteko parada emanez. Profesionalak eta artista amateurrak elkarren ondoan ariko dira, pintura, eskultura, argazkilaritza, marrazkia eta bideoa bezalako sorkuntza moldeekin.
Antolatzaileek 18 eta 25 urte arteko sortzaile gazteentzako gune berezi bat ere prestatuko dute, artista berriei ikusgarritasuna eskaintzeko. Parte hartu nahi duten artistek irailaren 11 arte eman dezakete izena Herriko Etxeko kultura zerbitzuan. Publikoarentzat erakusketa urririk izanen da eta ez da aitzinetik izena eman beharko.
