Bedatseko lehen egünetik hasirik, larrazkenaren hasbürüala, pelota eskü-hüskako Xiberoko Txapelgoak harrotü dütu kartieleko arrabotü bazterrak. Eta nolaxe harrotü ere, partidak agitü diren 14 herrietako arrabotü ingürüak jentez künküiño bete beitira, aldikal! Aurtenko txapelgoa 12.a zen eta urteak jin-urteak joan, Alain Mugurdoy ostalerak, Urdiñarbeko Bil Xokoa alkarteak eta Maule- Lextarreko SAM Pelota klubak esküz eskü plantatzen düen lehiaka horrek arrakasta ederra biltzen dü. Orotako kausitze ederrena da, haatik, Züberoako gazteer eskü-hüskala arraplantatzeko gogoa emaiten deiela. Urdiñarbeko arrabotü propian, setemeraren 13an (3. maila) eta 15ean (2. eta 1. mailak) finalak jokatürik, hona zoin diren aurtenko txapelgoaren emaitzak: 3. mailan, Baptiste Irigoin eta Pantxo Curutchet txapeldün, Allande Barreix eta Peio Idiart goitürik, 30/13; 2. mailan, J.B. Ayçaguer eta Allande Iritçity txapeldün, Guillaume Bernard eta Sébastien Arla goitürik, 30/29. Partida hau Urdiñarbeko arrabotüan hasi da, bena ebi tzarraka bat agitürik... Sohütako pelotakagian ürrentü da, emaitza oso tiran batekin. Lehen mailako finalarentako, berriz, Urdiñarbeko arrabotüa hein bat txükatü ondoan, beste arrenkürarik gabe jokatü da. Ororen bürüan, Sébastien Quéheille eta Alexis Inchauspé pareak txapela bildü dü, Michel Latchère eta Cédric Lucu goitüz, 30/18. Final horrentako, Alexis Inchauspé hazpandarrak ordezkatü dü Thierry Harismendy donamartiriarra, honek partida bat mezperan jokatü beitzüan eta Lekuinen beste bat jokatü behar beitzüan biharamenean! Halerik ere, Urdiñarbeko arrabotü saihetsean zen, 1. mailako final eder horren ikusteko. Arren, Xiberoko Txapelgoaren 12. antolaldia ürrentü da eta berantesten zaigü jadanik 13. lehiaka!