Hiru gira, handitu gira, puztu, ausartu. Arantxa sartu da abenturan, hezkuntza artistikoaz arduratzeko. Artea hezten da eta ontzen, udazkeneko mahatsak bezala, gure arnoa guziona da, gazteek antzerkia edateko eskubidea ukan dezaten. Euskaraz eta hemen. Udako garia bildurik, eguzkiak puzturik, antzezlan berri batekin gatoz: Zaldi Urdina: Zaldia, heroina, urdina eta latza. Latza izan da eragina, erabilera eta askatasun gosez zebilen herri bat, ito egin da. Askatasun gosea oraino hor bada, Zaldi Urdina ere hortik dabil, salbai, desiragarri, urdin eta ilun. Urriaren 11n, Luhusoko Harri Xurin estreinatuko dugu, urduri gaude, txiki. Hainbat istorio izan dira hemen edo hor isilduak, burumakurtzekoak. Argitara ekarriko ditugu, txori zauritu bat ekar genezakeen bezala: À¯'ƒ'¼ Urriak 11 Luhuso: Harri Xuri (20:30). À¯'ƒ'¼ Urriak 15 Angelu: Quintaou antzokia, Black Box (20:30). À¯'ƒ'¼ Urriak 16 Angelu: Quintaou antzokia, Black Box (15:00) eta (20:30). À¯'ƒ'¼ Urriak 18 Angelu: Quintaou antzokia, Black Box (20:30). À¯'ƒ'¼ Urriak 19 Angelu: Quintaou antzokia, Black Box (20:30). Axut!, Artedrama eta Dejabu partaideak, Unai Iturriaga eta Igor Elortza idazte-kideak, eta ametsak bidelagun. Laster elgar ikusiko dugu.